Тенисерките често испуштаат чудни звуци за време на играта, а Белорусинката Арина Сабаленка е една од најгласните.
Таа честопати беше обвинувана од нејзините противнички дека е премногу гласна за време на играта и дека премногу вреска за време на ударите, но никогаш не сакала да го признае тоа.
Сега Белорусинката гостувала во американската емисија „The Tonight Show Starring Jimmy Fallon“, а Фалон ја прашал за врескањето за време на ударите, при што таа за прв пат признала дека самата сфатила колку е непријатно тоа.
Сабаленка истакнала дека станала свесна за гласноста на своите врескања за време на ударите кога играла егзибициски натпревар со Новак Ѓоковиќ.
Тогаш, тенисерите во Австралија биле озвучени, а Сабаленка сфатила зошто ги иритира своите ривалки.
„Немам контрола врз тоа. Сфатив колку врескам дури со Новак Ѓоковиќ. Еднаш играв егзибициски натпревар со него и ми ставија озвучување, па дури тогаш сфатив колку врескам за време на ударите. Помислив: „О, Боже, ова е навистина лошо за другите луѓе, треба да им се понудат чепови за уши“, раскажала Сабаленка со смеа.
Сепак, одговорот на прашањето дали тоа ќе се промени во иднина бил негативен.
„Не сакам да ги нервирам луѓето, тогаш сакав да го тргнам озвучувањето, но мислам дека го исклучија звукот кога ја удирав топката. Немам контрола, за жал на сите луѓе што гледаат“, додала Сабаленка.
Потоа таа коментирала за нејзината посебна врска со Ѓоковиќ, која често е тема на медиумите.
Неодамна, фотографија од Новак и неговата сопруга Јелена, заедно со Сабаленка и нејзиното момче Џорџос Франгулис, го привлече вниманието на обожавателите.
„Беше одлично! Беше забавно. Секогаш е интересно да се помине време со Новак и Јелена, тие се навистина убав пар. Се смеевме многу и вечерата беше одлична. Исто така, трениравме заедно. Тоа беше тренинг со многу висок интензитет за мене, веројатно со многу низок интензитет за него. Се трудам колку што можам да го одржам нивото. Тоа беа неколку забавни недели во Грција“, раскажала тенисерката.
Патем, српскиот тенисер дури и вложил финансиски средства во проект што го води момчето на Сабаленка, Франгулис.
Се работи за инвестиција во францускиот фудбалски клуб Ле Ман, во кој инвестирале Ѓоковиќ, Фелипе Маса и Кевин Магнусен.
