Фенг шуи не значи дека мора да живеете во минимализам и да се ослободите од сите предмети кои ги сакате за да постигнете благосостојба и позитивна енергија. Ако сакате да го примените во вашиот дом, доволно е да се придржувате до неколку практични совети за да постигнете мир и хармонија – а попатно и заштеда.

На пример, добро проветрувајте ги просториите. Звучи банално, но едно од правилата на фенг шуи е слободен проток на воздух во просторијата, без затрупани премини и блокирани прозорци. Мебелот поставете го така што нема да ги блокира радијаторите и климата, бидејќи така греењето и ладењето ќе функционираат поефикасно, а вие ќе трошите помалку енергија.

Фенг шуи поттикнува што е можно повеќе дневна светлина во просторот – големи прозорци, огледала што ја рефлектираат светлината и светли бои на ѕидовите. Тоа значи помала потреба од вештачко осветлување во текот на денот, што ќе ги намали вашите сметки за струја.

Растенија – добар избор

Не заборавајте на растенијата, кои се исто така важен елемент во филозофијата на фенг шуи. Познато е дека зеленилото внесува живот во домот, но избирајте ги само оние што поттикнуваат позитивна енергија и можат да се користат во влажни простории, како бања и кујна. Растенија како бамбус, дрво на парите и јазикот на свекрвата се одличен избор – не само што му даваат природен изглед на просторот, туку и го прочистуваат и разладуваат воздухот. Уште еден практичен начин за заштеда на енергија во домаќинството.

Прочистена спална соба

Применете ги фенг шуи принципите и во спалната соба. Мебелот и ѕидовите треба да бидат ослободени од вишок предмети, а наслонот на креветот поставете го цврсто до ѕид, дијагонално од влезната врата, бидејќи оваа позиција создава чувство на сигурност. Баланс постигнете со поставување ноќни масички покрај креветот. Избирајте дрвени и природни материјали, бидејќи тие создаваат пријатна атмосфера и чувство на хармонија. При избор на осветлување, фенг шуи консултантите советуваат користење на амбиентално светло, како мали ламби, свеќи и украсни светилки, кои ќе ве смират по напорен ден. Вградете прекинувачи со затемнување, со што ќе можете да ја осветлите собата онолку колку што ви е потребно – и да ги намалите сметките.

Совети за заштеда на енергија во дневната соба

Дневната соба често е централна просторија во домот каде што се поминува најмногу време, но и каде што се губи најмногу енергија – било поради греење, осветлување или уреди што постојано работат. Мали промени во навиките и неколку едноставни додатоци можат значително да ја намалат вкупната потрошувачка на енергија.

Заштеда на топлинска енергија

• Ако користите радијатори, осигурајте се дека не се закриени со мебел или завеси. Топлината така ќе се шири порамномерно и поефикасно.

• Затворајте ги вратите од простории што не ги користите и грејте ги само оние во кои престојувате. Така ќе избегнете непотребно загревање на целиот стан.

• Искористете ја сончевата енергија – преку ден разместете ги завесите и кренете ги ролетните, а навечер повторно затворете ги за да ја задржите топлината.

• Погрижете се да нема губење на топлина преку прозорци и врати. Ако почувствувате промаја, поставете завеси или изолациски ленти.

• Поставете рефлектирачка фолија зад радијаторите за да спречите топлината да се губи кон студените ѕидови.

• Редовно чистете ги радијаторите – прашината ја намалува ефикасноста на преносот на топлина.

• Надворешната единица од клима уредот треба да се постави на постудени или засолнети места, доколку е можно, бидејќи е поефикасна во сезона на ладење.

Заштеда на електрична енергија

• Користете LED осветлување во дневната соба – троши до 90% помалку струја во споредба со класичните сијалици и има значително подолг век на траење.

• Вградете прекинувачи со можност за затемнување – покрај заштедата, ќе можете да го прилагодите осветлувањето според потребите и атмосферата.

• Исклучувајте ги телевизорите, музичките уреди и полначите кога не се користат. Во „stand-by“ режим, уредите сè уште трошат струја.

• Користете разводници со прекинувач – со еден клик може да исклучите повеќе уреди истовремено и да избегнете непотребна потрошувачка.

• Исчистете ја прашината од сијалиците – таа ја намалува јачината на светлината, што може да ве наведе да купувате посилни сијалици отколку што навистина ви се потребни.

• Фрижидерот или замрзнувачот не ги поставувајте во близина на извор на топлина (како шпорет) или на директна сончева светлина – топлината ги тера уредите да работат во интензивен режим, што ја зголемува потрошувачката на енергија.

• Користете штедливи начини за сушење облека – природно сушење на воздух ја намалува потрошувачката на електрична енергија.

Во дневната соба често не забележуваме како се расфрла енергија – уредите се вклучени со часови, а топлината излегува преку слабо изолирани прозорци. Но, со неколку едноставни чекори, можете да остварите значајни заштеди и да го направите вашиот дом поудобен и еколошки поодржлив.