Откритијата доаѓаат во време на правна битка со нејзините поранешни деловни партнери, кои тврдат дека ја посакувала смртта на ќерка ѝ за да може да стане „кралица“ на наследството на Елвис Присли. Во мемоарите, Присила тврди дека Џексон се оженил со Лиса Мари само поради статусот што доаѓа со презимето Присли, дека ги избегнувал возрасните на семејните собири и дека инсистирал да имаат дете и покрај двосмислената природа на нивната интимност.

Брак како маркетиншки трик

80-годишната Присила во книгата вели дека Џексон, познат како „Кралот на поп-музиката“, бил исклучително манипулативен. Таа призна дека била „ужасната“ кога Лиса ѝ ги соопштила нивните планови за венчавка во 1994 година. „Во себе знаев дека Мајкл не се жени со Лиса Мари; тој се жени со династијата Присли“, напиша таа, додавајќи дека тоа бил потег за поправање на неговиот имиџ во време кога се соочувал со обвинувања за злоупотреба на малолетници.

„Мајкл беше манипулативен човек и мислам дека „фрлил око на неа“ долго пред таа да го сфати тоа“, се вели во книгата. „Детската невиност што ја проектираше беше дел од неговата јавна маска“.

Притисок да имаат дете и нејасна интимност

Присила понатаму опишува како по венчавката Џексон ја избегнувал по секоја цена. Кога се појавувал на семејни собири, се дружел само со деца, игнорирајќи ги возрасните. Таа тврди дека ја обесхрабрувала својата ќерка да има дете со пејачот.

Од друга страна, Џексон наводно многу сакал дете, што Присила го сметала за „бизарно“ бидејќи не била сигурна дали воопшто имало интимен однос меѓу нив. Кога ја прашала својата ќерка за тоа, Лиса Мари наводно потврдила дека биле интимни.

Контрола врз наследството

Двојката се развела во август 1996 година. „Речиси можев да го слушнам Елвис како воздивнува од олеснување“, напиша Присила. Нејзините тврдења за мотивите на Џексон доаѓаат само неколку месеци откако нејзините поранешни деловни партнери Брижит Крусе и Кевин Фијалко изнесоа сериозни обвинувања на суд. Во поднесокот, тие ја опишале како опсесивна личност која сакала исклучива контрола врз имотот „без оглед на цената“.

„Обвинетата Присила Присли отсекогаш сакала да биде „Кралицата“. (…) Присила на крајот сакала едно нешто, моќ, без оглед на цената“, се наведува во судските документи. Таа цена, тврдат тие, била животот на нејзината ќерка. „Присила брзо отишла во болница (…) и покрај јасната директива на Лиса да „го продолжи својот живот“, Присила ги исклучила апаратите за одржување во живот во рок од неколку часа по приемот на Лиса“, тврдат тие.

Од друга страна во книгата, Присила ја нуди својата страна од приказната за смртта на Лиса Мари. Таа тврди дека откако лекарите успеале да го рестартираат срцето на нејзината ќерка, ѝ било кажано дека најверојатно самостојно не би можела да преживее. Затоа донела одлука да се исклучат апаратите за одржување во живот и додаде дека потоа се онесвестила, а целото искуство било „неподносливо“.