По финалето на Светското првенство, бројот на следбеници на „Instagram“ профилот на Инес Гарсија Сантос нагло пораснал. Според пишувањата на шпанските медиуми, за само неколку дена добила околу 1,5 милиони нови следбеници, а фотографијата на која позира со своето момче Ламин Јамал собрала повеќе од 15 милиони лајкови.

Но, со популарноста пристигнале и негативните коментари. Корисниците на социјалните мрежи почнале да споделуваат фотографии од Инес со нејзиниот поранешен партнер, со кого наводно била во врска пет години, тврдејќи дека многу брзо го заменила со славниот фудбалер. Особено внимание привлече коментарот „Те сакам, душо“, кој му го оставила на поранешното момче само неколку недели пред да заврши нивната врска.

„И јас сум само човек“

Поради бројните навреди, таа одлучи јавно да се огласи на социјалните мрежи. „Никогаш не помислив дека објавување на нешто толку едноставно ќе прерасне во ова. Со часови ги читав коментарите и, иако се трудам да останам силна, и јас сум само човек. Зад овој профил стои личност која има чувства, која плаче и греши“, порача таа.

Таа додаде дека разбира оти секој има право на свое мислење, но смета дека постои голема разлика меѓу критика и навредување. „Никого не повредувам. Никому ништо не сум одзела. Едноставно си го живеам својот живот. Размислете дека од другата страна на екранот се наоѓа личност која исто така има семејство, пријатели и чувства“, порача таа.

На крајот истакна дека од луѓето не бара да ја сакаат, туку само малку емпатија и почит. „Се надевам дека интернетот еден ден ќе престане да биде место на кое се слави суровоста“, заклучи таа.