Откако прифатил исклучително строг режим на живот и исхрана, Љоренте во изминатите неколку години успеал да пронајде рамнотежа. Го достигнал она што денес го смета за најсреќниот период во својот живот.

Живот во склад со сонцето

Тој не е како просечниот фудбалер, а својата врвна форма ја припишува на необичниот начин на живот што го води.

Љоренте го следи циркадниот ритам – внатрешниот биолошки часовник на телото кој во текот на 24 часа ги регулира основните функции, како што се циклусот на спиење и будење, лачењето хормони, варењето и телесната температура. Најмногу е под влијание на изложеноста на светлина, која му сигнализира на „главниот часовник“ во мозокот да ослободува хормони како мелатонин за сон и кортизол за будност.

Во согласност со овој ритам, неговиот просечен ден изгледа вака:

Се буди непосредно пред изгрејсонце.

Откако ќе стане, излегува надвор за да се изложи на сончева светлина додека пие шолја кафе подготвено со две или три лажици путер од крави хранети со трева.

Пред тренинг, шета без маица дури и во зима, што го документира и на социјалните мрежи, бидејќи изложеноста на студ рано наутро помага во закрепнувањето, природно го зголемува нивото на мелатонин, го зајакнува имунолошкиот систем и гради ментална дисциплина.

Оброците ги внесува во релативно краток временски период, а најважен му е ручекот околу 14:00 – 14:30 часот.

Вечера непосредно пред зајдисонце, па времето на вечерата се менува во зависност од сезоната – од околу 17:30 часот во зима до 19:30 часот во лето.

На спиење оди редовно меѓу 22:00 и 22:30 часот.

Но, тука не завршуваат необичните, строги и прилично скапи навики на познатиот фудбалер.

За да го подобри квалитетот на сонот, за време на спиењето носи паметен титаниумски прстен кој го следи неговиот сон, физичката состојба и нивото на стрес. Покрај тоа, спие на кревет изработен по мерка, вреден околу 35.000 евра, кој го регулира неговиот циклус на спиење.

Додека на отворено целосно се потпира на природната сончева светлина и никогаш не носи очила за сонце, во затворен простор има поинаков пристап. За да ги филтрира штетните зраци од вештачкото осветлување, ламбите, телефонот и телевизорот, користи два вида леќи: жолти преку ден и црвени навечер. Овие филтри прават вештачката светлина повеќе да наликува на природната сончева светлина.

Кога станува збор за исхраната, 31-годишниот фудбалер се придржува до палеолитската диета. Инспирирана од начинот на исхрана на луѓето пред повеќе од 10.000 години, оваа диета се заснова на висок внес на протеини, целосно исфрлање на додадениот шеќер и минимален внес на јаглехидрати.

Целта на палео-диетата е да се консумира храна што најверојатно ја јаделе првите луѓе. Диетата се темели на идејата дека нашите гени не се целосно приспособени на современата исхрана, која се развила со појавата на земјоделството, наведува „Mayo Clinic“.

Доколку сакате и вие да ја следите оваа диета, исхраната треба да ја базирате на:

✅овошје,

✅зеленчук,

✅јаткасти плодови и семки,

✅јајца,

✅немасно месо, особено од животни хранети со трева или дивеч,

✅риба, особено богата со омега-3 масни киселини, како лосос, скуша и туна,

✅масла добиени од овошје и јаткасти плодови, како маслиново или масло од ореви.

Од друга страна задолжително треба да избегнувате:

❌житарки, како пченица, овес и јачмен,

❌мешунки, како грав, леќа и кикиритки,

❌млечни производи, како млеко и сирење,

❌рафиниран и додаден шеќер,

❌додадена сол,

❌зеленчук богат со скроб, како пченка, грашок и бел компир,

❌високо преработена храна, како чипс и колачиња.

Ако сакате денот да ви изгледа како оној на Љоренте, можете да се храните вака:

✅Појадок: печен лосос и диња.

✅Ручек: салата од морков, краставица, домат, авокадо, ореви и прелив од сок од лимон.

✅Вечера: печен говедски бифтек, варена брокула, салата од мешан зеленчук, домати, авокадо, кромид, бадеми и прелив од сок од лимон, а за десерт – јагоди.

✅Ужина: портокал, стапчиња од морков или целер.

Сепак, иако во палеолитот не се консумирало, Љоренте признал дека сака добро вино.