Марјолин Јонкер има 50 години и во Холандија го започнала движењето „мали куќи“ уште во 2016 година, кога ангажирала тројца студенти да ѝ дизајнираат прва мини-куќа на тркала и ги убедила властите во Алкмар да ѝ дозволат да користи мало земјиште за период од пет години.

Мини куќа

Живеела целосно надвор од системот во куќа со димензии 6,6 х 2,6 метри и наскоро станала лице на растечкиот тренд. Помагала на луѓето кои копнееле по поедноставен и одржлив начин на живот и ја основала фондацијата „Tiny House Netherlands“.

По пет години се преселила во Олст, каде што купила нова мала куќа со приклучена стаклена градина и систем за собирање на дождовница.

„Почнав да го барам своето парче земја и го најдов во Олст, на другата страна од земјата. Во новата мала куќа живеам од 22 јуни, и уште е поубава од првата. Малку е поголема – има 24 квадратни метри станбен простор и приклучена стаклена градина. Новата куќа не е приклучена на електрична мрежа, но има приклучок за вода и канализација. Машината за перење и тоалетот работат на посебен систем за дождовница“, објаснила Марјолин Јонкер.

Таа користи биолошки материјали и се труди да има што помал еколошки отпечаток. Вели дека во мал простор нашла мир, слобода и вистински дом – и дека поголема куќа никогаш не би ѝ донела толку среќа.

За земјиштето вели дека платила 94.505 до 108.610 евра, а за дизајнот на куќата 16.000 евра.

Помал еколошки отпечаток

Не постојат посебни правила за малите куќи – некои се на тркала, други се фиксни; некои сопственици ги дизајнираат и градат сами, додека други соработуваат со архитект или избираат монтажна варијанта.

Но, сите ги поврзува посветеноста кон живот со што помал еколошки отпечаток и без голем долг што обично оди со хипотеката за конвенционална куќа.

Во Холандија, малите куќи обично имаат помеѓу 15 и 50 квадратни метри, а бидејќи холандските градежни прописи им отежнуваат на градителите на мали куќи да најдат трајно место за живеење, повеќето од нив се градат на приколки – затоа што мора да бидат подвижни.