Овој процент ја изненадил дури и работната група на Италијанскиот институт за биоекономија. Нивното истражување е едно од ретките во Европа што го потврдило терапевтското дејство на растенијата, претходно откриено во лабораториски експерименти на НАСА уште во 1980-тите.

Еликсир за дишниот систем и расположението

Секое растение е корисно за намалување на јаглеродниот диоксид и смогот. Тие природно апсорбираат материи присутни во воздухот преку стомите (мали отвори на листовите и стеблата), смолата и влакненцата на листовите, како дел од нивниот витален процес — фотосинтезата, преку кој јаглеродниот диоксид се претвора во кислород.

Стомите се структури преку кои растенијата впиваат CO₂ и загадувачи, додека смолата и влакната (трихоми) на листовите се важни за „фаќање“ на честичките што лебдат во воздухот.

„Затоа најделотворни собни растенија против смог се оние што имаат најмногу стоми и восочна површина. Многу од тие растенија создаваат прекрасни, шарени цветови – како хризантеми и гербери – што истовремено му годат и на окото и на расположението. Божиќната ѕвезда, на пример, е одлична против формалдехид и токму затоа ја подарувам за време на божиќните празници“, вели д-р Роберто Бофи, пулмолог и началник на Одделот за пулмологија на Националниот институт за тумори во Милано.

Истражувањата се согласни дека растенијата, и собните и градинарските, имаат способност позитивно да влијаат на нашето расположение. Во една студија од 1976 година, њујоршкиот психијатар Џон А. Талбот заклучил дека постои јасен доказ како присуството на хризантеми го зголемува моралот и позитивниот однос кон работата кај болничкиот персонал во психијатриските болници. Голем број членови на персоналот изјавиле дека растенијата „го осветлиле и разубавиле просторот и го направиле пожив“.

Прим. Бофи, увидувајќи ја важноста што изборот на растенија за нашите домови може да ја има за здравјето на белите дробови, составил список на оние растенија врз кои се спроведени лабораториски истражувања и кои имаат докажана ефикасност кога станува збор за прочистување на воздухот во затворен простор.

Алое вера

Одлично е за спални соби бидејќи, како и другите сукуленти, го апсорбира јаглеродниот диоксид додека спиеме, а преку ден го испушта, при што ноќе ни подарува кислород.

Антуриум или цвет на фламинго

Тоа е едно од растенијата кои ги тестирала НАСА и кое се покажало како одлично за прочистување на воздухот од амонијак, кој го апсорбира со брзина од 10 микрограми на час. Ѝ одговара температура не пониска од 16 °C и бара доста влага, па е добро повремено да ѝ се прскаат листовите со вода за да останат живи и активни. Корисна е и нејзината способност да впива непријатни мириси.

Слонова нога

Нолина или „Beaucarnea recurvata“ е позната по тоа што апсорбира чад, а може да опстане и во затворен и во отворен простор, достигнувајќи импресивни димензии. Позната е по тоа што е многу отпорна на пожари, благодарение на огромните резерви вода во долниот, заоблен дел од стеблото. Тестирана е за способноста да апсорбира никотин и е докажано дека таа задача ја извршува беспрекорно.

Зелен лилјан (Chlorophytum)

Ова растение со атрактивен изглед има многу тесни и долги листови, како и корени кои никнуваат од бројни гранчиња и одлично ја вршат функцијата на апсорпција на формалдехид, јаглерод моноксид, бензен и ксилен.

Хризантема

Сортата која ја тестирала НАСА се нарекува „morifolium“ и се покажала како исклучително ефикасна против бензен — веднаш по герберот. Овие две растенија се одликуваат со цветови што можат да бидат во различни бои и со речиси непозната, но голема способност за прочистување на воздухот што го вдишуваме. Хризантемата е ефикасна и во прочистување на воздухот од формалдехид и други штетни материи, а притоа и убаво изгледа.

Дифенбахија

Главно апсорбира ксилен и толуен — две материи што се ослободуваат во затворени простории од принтери и фотокопир апарати, но и од компјутерски монитори, лакови, таписерии и лепила. Совршено растение за работен простор.

Драцена

НАСА тестирала разни сорти на драцена, а била испитувана и во бројни други студии. Најчесто тестирани сорти се „marginata“, „massangeana“ и „deremensis“, кои имаат способност за прочистување на воздухот. Сите три одлично апсорбираат формалдехид, бензен и трихлоретилен (растворувачи што се докажано канцерогени). Особено драцена „massangeana“ ја намалила присутноста на формалдехид во тест кабината за 70%, а драцена „deremensis“ за 50%.

Хедера (бршлен)

На балконите функционира како бариера против загадениот воздух, а притоа не е барана за одгледување. Во внатрешни простории апсорбира формалдехид, кој е обилно присутен во затворените простори. Тестирана е — со одлични резултати — и на ултрафини честички, широко присутни во средини каде што престојуваат домашни животни. Нејзина голема предност е високата отпорност.

Папрат

Одличен е во апсорпција на формалдехид и чад од цигари. Може да се држи на балкон, пред прозорецот или било каде во станот.

Фикус бенџамин

Голем „проголтувач“ на формалдехид. Се покажало дека апсорбира речиси половина од формалдехидот присутен во просториите каде што бил тестиран. Исто така, се покажал како многу ефикасен против бензен и бројни други штетни материи што се ослободуваат од чадот на цигари.

Фикус еластика (гумено дрво)

Овој вид фикус е честo собно растение, меѓу другото и затоа што сака топлина, а одличен е против формалдехид и сите штетни материи што потекнуваат од средства за чистење, како и против материи што се ослободуваат од лепила и од атмосферското загадување.

Гербер

Ова е едно од најдобрите растенија против загаденост на воздухот во внатрешни простори. Во лабораториите на НАСА токму ова растение апсорбирало најголема количина микрограми бензен — речиси 70 проценти — и половина од формалдехидот присутен во тест кабините.

Каланхоа

Како и сите сукуленти, идеална е за спална соба, бидејќи и ноќе создава кислород. Осетлива е на промени во температурата и не треба да се поставува во близина на радијатори ниту на директна сончева светлина. Многу е отпорна и многу погодна за лица што немаат „зелена рака“. Со своите широки листови, меѓу другото, „фаќа“ и формалдехид.

Муса орната

Позната и како украсна банана, егзотична е и ефикасна во отстранување на формалдехид од воздухот. Може да се одгледува во домот или на отворено, доколку климата е топла. Тоа е едно од растенијата што научниците од НАСА ги тестирале и ја потврдиле нивната ефикасност.

Џуџеста урма (феникс палма)

Потекнува од јапонскиот остров Хачиџо-џима, а нејзината главна функција е прочистување на воздухот. Потврдена е нејзината способност за апсорпција на загадувачи како формалдехид, ксилен и толуен. Совршена е за затворени простори, балкони, но и за градини во умерени климатски подрачја, каде што може да порасне до висина од 2,5 метри.

Бамбусова палма

Во експериментот на НАСА се покажало дека токму ова растение „фатило“ најголема количина формалдехид, но исто така е ефикасно и против јаглерод моноксид, ксилен, бензен и други загадувачи. Создава многу влага, па во зима, кога се вклучени радијаторите, помага во навлажнување на сувиот воздух и го прави помалку агресивен за дишните патишта.

Потос (златен ползавец)

Едно од најчестите растенија во канцелариски простори, бидејќи лесно се размножува и не е барано за одгледување. Обично се одгледува во саксии, но често може да се види и потопено во вода во проѕирни садови — и поради естетскиот ефект и затоа што така побрзо расте. Ова растение буквално „голта“ формалдехид. Но, имајте на ум: за растението правилно да функционира, неопходно е редовно да му се менува водата — најмалку еднаш неделно — за да се спречи развој на штетни бактерии и да се обезбеди свеж кислород за корените.

Сансеверија или „свекрвин јазик“

Совршен избор за спална соба, бидејќи е едно од растенијата што вршат фотосинтеза ноќе, додека спиеме. Апсорбира алкохол, ацетон, бензен и формалдехид. Не ѝ е потребно многу вода, бара малку светлина — по можност не директна. Поради тоа, како и поради нејзината издолжена форма што не зазема многу простор, погодна е и за бањи.

Шефлера

Може да достигне висина до 2 метра и се одликува со живо, бујно зеленило во различни нијанси на зелена боја. Исклучително е декоративна. Ова растение било користено во експерименти во училишта и се покажало како одлично во отстранување на ацетон, метанол, бензен и амонијак.

Спатифилум

Елегантно растение со бели цветови што ни помага да вдишуваме почист воздух, апсорбирајќи органски испарливи материи како бензен, формалдехид, амонијак, тетрахлоретилен, толуен, ксилен и други. Студиите покажале дека може да апсорбира и големи количини ацетон и метанол.

Јука

Нејзините долги, заострени листови апсорбираат јаглерод диоксид и бројни материи што ги создаваат електричните домашни апарати, како и компјутерите, принтерите и фотокопир апаратите. Многу е декоративна и убава, па е позната и како „дрво на среќата“. Тоа е градинарско растение што добро поднесува и затворени простори, но многу ѝ штетат температури под 8 степени и задржување на вода во саксијата или подлошката.