Студијата, објавена во научните списанија „Nutrients“ and „Frontiers in Nutrition“, е прва што детално ги испитала ефектите на една конкретна намирница врз здравјето на доенчињата. Спроведена е на највисоко ниво на научна сигурност, користејќи двојно слеп, рандомизиран, плацебо-контролиран пристап.

Иако боровинките често се нарекуваат суперхрана за возрасните, нивните ефекти врз бебињата досега не биле посебно проучувани.

„На родителите кои почнуваат да воведуваат цврста храна често им е тешко да пронајдат совети базирани на вистински истражувања“, рече раководителката на студијата и професорка по педијатрија, Мингуа Танг.

Оваа студија е важен прв чекор бидејќи ги покажува конкретните придобивки од боровинките за здравјето на доенчињата.

Во студијата учествувале 61 дете од подрачјето на Денвер, на возраст од 5 до 12 месеци. Секојдневно им била давана мала количина на прав од лиофилизирани (замрзнато-сушени) боровинки или плацебо во прав без активни состојки, додека нивните родители продолжувале со вообичаената исхрана на бебињата. На секои два месеци се земале примероци од столицата и крвта, а биле следени и евентуалните алергиски реакции, растот на децата и општите навики во исхраната.

Помалку воспаленија, посилен имунитет

Резултатите покажале дека бебињата кои консумирале боровинки имале поблаги симптоми на алергија, пониски нивоа на воспаление и посилен имунитет. Промени биле забележани и во составот на цревната микробиота – тие биле корисни за развој на здрав имунолошки систем.

Како да му понудите боровинки на вашето бебе?

За бебиња кои штотуку почнуваат да јадат цврста храна, боровинките најдобро е да се пасираат за да се намали ризикот од задушување. За постари доенчиња и мали деца, тие може да се згмечат или исечат на многу мали парчиња.

„Нашето истражување потврдува дека боровинките не само што се безбедни, туку и многу корисни за здравјето на бебињата“, истакна проф. Танг.

Само неколку боровинки дневно можат да имаат позитивно влијание врз развојот на имунитетот и здравјето на цревата. Раната исхрана е многу важна, бидејќи колку порано ги воведуваме вистинските намирници, толку се поголеми придобивките за идниот раст и развој.

Научниците нагласуваат дека се потребни повеќе истражувања за подобро да се разбере како другите намирници влијаат врз бактериите во цревата и имунолошкиот систем на рана возраст. Таквото знаење ќе им помогне на родителите да носат подобри одлуки за исхраната на своите деца засновани врз научни докази.