Одржувањето на температурата во домот помеѓу приближно 18 и 20 степени Целзиусови е важно и за здравјето и за спречување на замрзнување и пукање на цевките. Експертите за греење од компанијата „All the Home“ го предлагаат најдобриот начин за задржување на топлината без постојано вклучување на радијаторите, а решението е многу едноставно: во текот на денот отворете ги завесите.

Како што објаснуваат, еден од најлесните начини за да се подобри задржувањето на топлината е приспособување на завесите според положбата на сонцето. Во текот на денот треба да се отворат завесите за да ѝ се овозможи на сончевата светлина да го загрее просторот. Природната сончева топлина може да ја зголеми температурата во просторијата и до 10 степени, со што значително се намалува потребата од греење.

Иако делува банално, отворањето на завесите за време на дневната светлина му овозможува на сонцето да загрее различни површини во домот, вклучувајќи ги ѕидовите, подовите и мебелот. На тој начин се создава ефект на стаклена градина кој задржува дополнителна топлина во просторот, па во вечерните часови е значително попријатно, пренесува „Express“.

Како да ги користите завесите за домот да биде потопол

Најдобро е оваа техника прво да ја испробате во просториите со прозорци свртени кон југ или запад, бидејќи тие во текот на денот добиваат најмногу директна сончева светлина. Доволно е завесите да ги отворите подоцна наутро, кога сонцето е најсилно, а да ги затворите во раните вечерни часови, веднаш штом ќе почне да се стемнува.

Експертите истакнуваат дека со затворање на завесите навечер ја задржувате топлината во внатрешноста на просторот. Оваа едноставна рутина на отворање и затворање на завесите може да го намали губењето на топлина и до 25 проценти, со што се намалува потпирањето на системот за греење.

Посветлите нијанси дополнително помагаат за порамномерна распределба на топлината, па поставувањето бел или светол тепих во просторијата што сакате да ја загреете може да даде забележлив ефект. Исто така, доколку имате фотелја или некое друго парче мебел во близина на прозорецот, поместете го за да не го блокира влезот на сончевата светлина.

Важно е и прозорците да бидат чисти, бидејќи дури и тенок слој нечистотија може значително да ја намали количината на природна светлина што влегува во просторот.

Одвојувањето само неколку секунди дневно за отворање и затворање на завесите може да помогне домот да остане потопол и топлината подолго да се задржи, без потреба радијаторите да работат непрекинато. Станува збор за исклучително едноставен начин за одржување на повисока температура во просторијата со помала потрошувачка на енергија, што овозможува скромни заштеди со минимален труд.