Лукот, често нарекуван „природен антибиотик“, повторно е во центарот на вниманието благодарение на зборовите на д-р Бранимир Несторовиќ, кој нагласува дека оваа намирница не само што го зајакнува имунитетот, туку може да помогне и во борбата против најотпорните инфекции и високиот холестерол.
Како што вели д-р Несторовиќ, лукот содржи голем број лековити материи, а најважни се сулфурните соединенија познати по силното антиоксидантно дејство. Освен што ги штити крвните садови, го забавува стареењето и ги зајакнува одбранбените механизми на организмот, лукот – доколку се користи правилно – може да биде ефикасно оружје против вируси и бактерии.
„Лукот има многу материи и сите се лековити. Најлековити се, секако, оние што мирисаат на сулфур, бидејќи сулфурните соединенија се многу силни антиоксиданси. И зелката ги има многу, и сите растенија од таа група – брокула, кељ… Користењето лук, при што дозата е прилично голема – мора да се зема 4 пати дневно по 4 чешниња и задолжително да се џвакаат. Не вредат оние правови или ако го додадете во јадењата, затоа што штом термички се обработи, многу од неговите соединенија се уништуваат. Лукот го скратува траењето на настинката за еден до два дена“.
„Во институтот Вајцман во Израел со него лекуваат малигни болести, секако на специфичен начин. Друго негово дејство е што го намалува холестеролот и ги штити крвните садови од атеросклероза. Третото својство е антиоксидантното. Кога е антиоксидантно – тоа е добро за сè: за стареење, за зајакнување на имунитетот и за сè друго“, вели српскиот доктор.
Лукот во борбата против инфекции
Доктор Несторовиќ објаснува и дека лукот може да помогне при лекување на инфекции на уринарниот тракт кај жените, дури и кај најупорните. Сепак, самиот тој не е доволен, па е добро да му се додаде брусница, која според него има многу благотворно дејство.
„Лукот е интересен затоа што станува збор за еден многу силен антибиотик кој се користи за лекување на многу отпорни инфекции на уринарниот тракт кај жените. Тој антибиотик се вика алицин, но тој се наоѓа во неактивна форма и затоа чешнето задолжително мора да се џвака. Кога се џвака, тој ензим се активира и се ослободува алицин. На пример, Индијците објавија уште пред десетина години дека инфекциите на простата кај мажите и инфекциите на уринарните патишта кај жените, кои се многу отпорни, ги излекувале со комбинација од лук и брусница“.
„Брусницата во себе содржи еден шеќер, D-маноза, кој може да се земе и во аптека ако не сакате да пиете сок од брусница. Тој шеќер всушност го блокира врзувањето на бактеријата Ешерихија коли (која најчесто предизвикува инфекција) за ѕидот на мочниот меур. Два пати по два грама D-маноза или брусница (при што подобро е американска брусница, бидејќи нашата има помала концентрација на тој шеќер) во комбинација со лук – за 10 до 14 дена ќе излечат најголем дел од ваквите инфекции“, вели д-р Несторовиќ.
