Лекари за медицинскиот портал „Healthline“ детално го објаснија овој систем на исхрана – дали е добар, за кого е наменет и кои се неговите недостатоци, но и кому не му се препорачува ваков начин на исхрана.

Постот постои илјадници години и претставува важен дел од многу религии и култури ширум светот. Денес се појавуваат нови варијанти на пост кои му даваат модерен изглед на овој древен обичај.

Една од најпопуларните форми на пост е 16/8. Поддржувачите тврдат дека тоа е лесен, практичен и одржлив начин за слабеење и подобрување на општото здравје.

Лекари и нутриционисти за „Healthline“ објаснуваат како функционира овој пост и кои се неговите предности и недостатоци.

Што претставува 16/8 интермитентен пост?

Практиката на 16/8 пост подразбира ограничување на внесот на храна и пијалоци кои содржат калории во временски период од 8 часа дневно. Во преостанатите 16 часа не се внесува храна, но е дозволено пиење вода и пијалоци без калории, како што се не засладено кафе или чај.

Овој циклус можете да го повторувате колку често сакате — од еднаш или двапати неделно, до секој ден, во зависност од вашите потреби и преференции.

Популарноста на овој облик на пост значително порасна кај оние кои сакаат да ослабат и да согорат масти. Исто така, се верува дека 16/8 постот ја подобрува контролата на шеќерот во крвта и придонесува за долгорочно здравје.

За разлика од многу диети кои пропишуваат строги правила, 16/8 интермитентниот пост е едноставен за следење и може да донесе видливи резултати со минимални промени во исхраната. Се смета за помалку рестриктивен и флексибилен во споредба со многу други режими и може да се вклопи во повеќето стилови на живот.

План на исхрана и како да започнете

За почеток, изберете временски период од 8 часа во кој ќе јадете и ограничете го внесот на храна само на тој период.

Популарни термини се:

• од 7 до 15 часот

• од 9 до 17 часот

• од 12 до 20 часот

• од 14 до 22 часот

Многумина го избираат периодот од 12 до 20 часот, бидејќи тогаш постат во текот на ноќта и го прескокнуваат појадокот, но сепак имаат време за урамнотежен ручек, вечера и ужина.

Други претпочитаат период од 9 до 17 часот, што овозможува појадок наутро, стандардно ручек околу пладне и лесна вечера или поголема ужина околу 16:30, пред почетокот на постот.

Можете да експериментирате и да изберете временски период кој најмногу ви одговара. Корисно е да си поставите потсетници на почетокот и на крајот на избраниот период, за да знаете кога е време за јадење, а кога за пост

Листа на намирници и план на исхрана

За да ги искористите максимално потенцијалните здравствени придобивки од 16/8 режимот, важно е во периодот кога јадете да внесувате нутритивно богата храна.

Полнењето на чинијата со хранливи намирници ви помага да одржите здрава телесна тежина и урамнотежена исхрана. Секој оброк треба да вклучува разновидна, целосна храна, како што се:

• Овошје: јаболка, банани, бобинки, портокали, праски, крушки, домати итн.

• Зеленчук: брокула, брюкселско зелје, карфиол, краставици, листест зеленчук итн.

• Цели житарки: јачмен, хељда, киноа, ориз, овес итн.

• Здрави масти: маслиново масло, авокадо

• Протеини: јајца, риба, мешунките, месо, живина, јаткасти плодови, семки итн.

Пиењето пијалаци без калории, како вода, незасладен чај или кафе, исто така помага да го контролирате апетитот и да останете хидрирани, дури и додека постирате.

Пожелно е да се ограничи индустриски преработената храна, како пакувани грицки, пржена храна, засладени пијалаци и повеќето замрзнати оброци, бидејќи тие може да ги намалат корисните ефекти од интермитентниот пост.

Предности на 16/8 интермитентниот пост

Една од главните предности на овој метод е неговата практичност – се намалува времето и парите кои ги трошите на подготовка на храна.

Исто така, се поврзува со низа здравствени придобивки, вклучувајќи:

1. Зголемен губиток на тежина

Ограничувањето на внесот на храна на неколку часа дневно може да го намали вкупниот број на внесени калории, што придонесува за слабеење.

Една анализа покажа дека 11 од 13 студии за интермитентен пост известиле за статистички значаен губиток на тежина.

2. Подобра контрола на шеќерот во крвта

Постот може да ги намали нивата на инсулин и шеќер во крвта, што потенцијално го намалува ризикот од дијабетес.

3. Продолжен животен век

Иако доказите кај луѓето се ограничени, некои истражувања на животни сугерираат дека постот може да влијае на продолжување на животниот век. Се смета дека тоа е поврзано со промени во метаболизмот, подобрена чувствителност на инсулин и позитивни однесувачки промени.

Недостатоци на 16/8 интермитентниот пост

Иако овој режим генерално е безбеден, може да има несакани ефекти и не е погоден за секого.

1. Прежестоко јадење и можност за дебелеење

Ограничениот временски прозорец може да наведе некои луѓе да се прејадат, за „надокнадат“ часовите на пост. Ова може да предизвика дебелеење, проблеми со варење и нездрави навики во исхраната.

Покрај тоа, постојат докази дека интермитентниот пост не води нужно до поголем губиток на тежина отколку класичните диети со намален внес на калории.

2. Враќање на килограмите

Губитокот на тежина за време на постот може да биде привремен – враќањето на старите навики може да ги врати и килограмите.

3. Физички симптоми на почетокот

Можат да се појават глад, слабост, замор, особено додека телото не се привикне на новиот режим.

4. Хормонални промени и менструален циклус

Некои истражувања на животни укажуваат дека постот може да доведе до хормонални промени кои влијаат на циклусот и плодноста кај лица со јајници. Сепак, потребни се повеќе квалитетни студии на луѓе.

Кај жени во постменопауза, ефектите може да бидат различни, бидејќи менопаузата ја намалува чувствителноста на инсулин и влијае на телесната тежина, па интермитентниот пост може да помогне.

Дали 16/8 интермитентниот пост е вистинскиот избор за вас?

Овој метод може да биде одржлив, безбеден и едноставен ако се комбинира со здрава исхрана и начин на живот. Сепак, не треба да се гледа како замена за избалансирана исхрана.

Можете да бидете целосно здрави и без практикување на интермитентен пост.

Иако 16/8 постот се смета за безбеден за поголемиот дел од здравите возрасни лица, задолжително консултирајте се со лекар ако имате хронични болести, земате лекови, имате низок крвен притисок, дијабетес или пореметувања во исхраната.

Исто така, интермитентниот пост не се препорачува ако се обидувате да забремените, ако сте бремени или доите.

Ако имате било какви дилеми или негативни симптоми, задолжително консултирајте се со стручњак.