А, ако кога некој вели појадок, прво помислувате на колачи, сендвичи, слатки кроасани, снегулки и слатки пијалаци од кафе, не сте на добар пат. Тоа се производи кои често се полни со шеќер и едноставни јаглехидрати кои предизвикуваат почетен скок на шеќерот во крвта по што следува пад.

Тие исто така придонесуваат за невроинфламација (воспаление околу мозокот), кое е поврзано со слаба концентрација и меморија во текот на денот, пишува д-р Ума Најдо за Си-ен-би-си.

„Моите истражувања и клиничка работа на чело на Одделот за нутриционистичка и метаболичка психијатрија во општата болница во Масачусетс ми помогнаа да научам дека има многу други опции за појадок кои можат да помогнат да се подобри вашата ментална кондиција. Бидејќи и јас се занимавам со готвење и сум автор на книги за готвење, исто така знам дека тие здрави, подобри избори за појадок може да биде вкусни и лесни за подготовка.

Секогаш предлагам да се испие шолја вода веднаш штом човек ќе се разбуди за да се избори против анксиозноста и дехидрираноста. Потоа, еве пет од моите омилени оброци за појадок кои се богати со клучните хранливи материи“, вели д-р Најдо.

1. Чиа пудинг

Домашниот пудинг од чиа семе е еден од моите омилени оброци за појадок. Полн е со влакна кои ги негуваат здравите бактерии во цревата и ја оптимизираат комуникацијата помеѓу цревата и мозокот и произведуваат невротрансмитери кои влијаат на доброто расположение. Содржи омега-3 масни киселини кои имаат силни антиинфламаторни ефекти врз мозокот, што дополнително помага во кревање на расположението, елиминирање на стресот и одржување на добрата меморија и концентрација.

Пудингот лесно се прави, а најдобро е да го направите претходната вечер. Измешајте три лажици чиа семе со шолја кокосово млеко (или друго незасладено млеко по ваш избор), малку мед и прстофат цимет и морска сол. Наутро додадете сечкани јаткасти плодови, бобинки и/или кокосови снегулки.

2. Кајгана или печена фритата

Ако јајцата се дел од вашата исхрана, размислете да го започнете денот со кајгана или печена фритата. Секогаш ги советувам луѓето да изберат домашни јајца, ако можат.

Јајцата се полни со здрави масти, протеини и витамини кои се неопходни за здрав мозок. Жолчките од јајце, на пример, се богати со витамин Д и серотонин, кои ви помагаат да постигнете оптимална рамнотежа на невротрансмитери кои го регулираат расположението.

3. Тофу омлет

Тофу е одличен, разновиден протеин кој е богат со триптофан и изофлавони од соја, за кои е докажано дека ги намалуваат симптомите на депресија.

Тофу омлет зачинет со куркума, бибер и морска сол е одлична алтернатива за јајцата, доколку не ги јадете или ако постите. По желба додадете и зеленчук.

4. Зелено смути

Измешајте го вашиот омилен зелен зеленчук како што е спанаќот, заедно со неколку парчиња бобинки, чист протеински прав и малку маснотии како путер од бадем. Не додавајте премногу овошје или каков било овошен сок за да го одржите нивото на шеќер и да избегнете нарушување на микробиомот или зголемување на нивоата на шеќер во крвта, како и замор.

Ова е брз, хранлив оброк што можете да го консумирате и во движење, а исто така ви помага да внесете влакна и фолати (природната форма на витамин Б-9) на почетокот на денот. Фолатите ни требаат за производство на невротрансмитери во мозокот, познато е дека недостигот на фолати е вклучен во голем број психијатриски состојби, вклучувајќи ја и депресијата, додека оптималните нивоа во телото се поврзани со подобро расположение.

5. Лате од куркума

Иако не мора да биде оброк сам по себе, латето со куркума е хранлив пијалак и неверојатен начин да го започнете утрото.

Лесно се прави: шолја од вашето омилено незасладено растително млеко измешајте со куркума и прстофат црн пипер. Ќе добиете моќен, антивоспалителен пијалак кој помага во намалување на симптомите на анксиозност, ја зголемува енергијата и придонесува за подобар фокус во текот на денот.