Една од најпопуларните криминалистички серии на Нетфликс се врати по две и пол години чекање. Втората сезона на серијата „The Gentlemen“ од денес е достапна на Нетфликс, а веќе се објавени и првите критики. Иако не се сите подеднакво воодушевени од продолжението, повеќето се согласуваат за едно – новата сезона е поголема, помрачна и побрутална.
Серијата ја создаде Гај Ричи како телевизиски спин-оф на истоимениот филм од 2019 година, а првата сезона, објавена во 2024 година, се претвори во голем хит на Нетфликс. Во главните улоги повторно се Тео Џејмс како Еди Хорниман и Каја Скоделарио како Сузи Глас.
Еди повеќе не е случаен криминалец
Втората сезона продолжува откако Еди и Сузи ја презедоа контролата врз криминалниот бизнис. Но, Еди овој пат повеќе не е аристократ кој се обидува да се извлече од светот на криминалот. Напротив – тој сака да ја прошири својата империја.
Поради тоа, нивниот бизнис ги надминува границите на Англија и ги води кон Италија и други делови од светот, а со поголемите амбиции доаѓаат и многу поопасни противници.
„Варајети“ особено ја издвојува промената на ликот на Еди и пишува дека Тео Џејмс во новата сезона влегува во својата „ера на Мајкл Корлеоне“. Еди станува помрачен, поамбициозен и поподготвен за насилство отколку што беше во првата сезона.
„TechRadar“, исто така, ја опишува новата сезона како помрачна, пожестока и побрутална, но смета дека притоа не ги изгубила стилот и забавниот карактер на првата сезона. Нивната оценка е особено позитивна – сметаат дека станува збор за една од најдобрите телевизиски содржини што Нетфликс ги нуди во моментов.
„Телевизиска брза храна“
Нешто повоздржани се во „Financial Times“, кој на сезоната ѝ доделува три од пет ѕвезди и ја опишува како „телевизиска брза храна“. Со други зборови, новата сезона не се обидува целосно да ја преосмисли серијата од почеток. И понатаму се присутни раскошните куќи, скапите автомобили, британските аристократи, гангстерите, црниот хумор, насилството и брзите дијалози по кои е познат Гај Ричи.
„АВ Клуб“, исто така, смета дека станува збор за забавно враќање, а особено ги издвојува акционите сцени, раскошните локации и визуелниот стил на серијата.
Сепак, дел од критичарите сметаат дека токму тука се крие и најголемиот проблем. „Радио Тајмс“ ѝ додели на сезоната три од пет ѕвезди и оцени дека ѝ недостига дел од самоувереноста и хуморот што го одбележаа почетокот на првата сезона. „Гардијан“, исто така, предупредува дека формулата на Ричи, по толку многу филмови и серии, може да делува веќе познато, па дури и предвидливо.
Од друга страна, критичарите особено ги пофалуваат новите ликови, меѓу кои се издвојува Хју Боневил, како и Даниел Ингс, чиј лик Фреди повторно носи некои од најлудите моменти во серијата.
Гледачите допрва почнуваат да ја гледаат
Првите реакции од публиката допрва пристигнуваат, бидејќи сите осум нови епизоди беа објавени овој четврток. На социјалните мрежи засега преовладува возбудата поради враќањето на серијата. Обожавателите особено дискутираат за односот меѓу Еди и Сузи, чија нерешена романтична тензија остана една од најпопуларните теми уште од првата сезона.
Дел од гледачите се надеваат дека нивниот однос конечно ќе прерасне во романса, додека други сметаат дека токму фактот што не се заедно го прави нивниот однос уште поинтересен.
Голем интерес предизвикува и Фреди. Обожавателите пред премиерата беа загрижени бидејќи тој релативно малку се појавуваше во трејлерите, додека првите критики сугерираат дека повторно има некои од највпечатливите сцени.
Првата сезона беше хит и кај критичарите и кај гледачите
Првата сезона на „The Gentlemen“ наиде на претежно позитивни критики, но уште подобро помина кај гледачите. На „Ротен Томатос“ има 75 отсто позитивни критики, врз основа на 71 рецензија, додека публиката ѝ даде 84 отсто. Критичарскиот консензус особено ги истакна стилот на серијата и актерската екипа, заклучувајќи дека, иако телевизиската верзија не секогаш успешно ги проширува идеите од филмот, таа е доволно енергична и забавна за да функционира како самостојна приказна.
На „Метакритик“, првата сезона има оценка 66 од 100, врз основа на 27 критики. Оценката од корисниците изнесува 7,5 од 10.
Уште подобра е ситуацијата на „ИМДб“, каде што „The Gentlemen“ во моментов има оценка 8,0 од 10, врз основа на повеќе од 182 илјади оценки од корисниците. Поединечните епизоди од првата сезона, исто така, се многу добро оценети – нивните оценки се движат од 7,7 до 8,2.
