Доналд Трамп навива за Англија на Светското првенство, сметајќи дека нивниот триумф би бил совршена приказна за одбележувањето на 250-годишнината од независноста на САД.
Американскиот претседател Доналд Трамп навива Англија да го освои Светското првенство, кое оваа година се одржува во САД, Мексико и Канада, потврдија од Белата куќа. Трамп, секако, првично навивал за американската репрезентација, па дури и интервенирал кај претседателот на ФИФА, Џани Инфантино, во обид да му биде поништен црвениот картон на Балогун. Но, од четирите преостанати селекции на Мундијалот, негов фаворит се Англичаните.
Белата куќа смета дека победата на Англија, по 60 години чекање, би била „одлична приказна за крајот на турнирот“, кој се одржува токму во периодот кога САД ја слават 250-годишнината од својата независност, пренесува британскиот таблоид „Daily Mail“.
Американскиот политичар Ендрју Џулијани, син на Руди Џулијани, поранешен градоначалник на Њујорк, кого Трамп го задолжил за прашањата поврзани со Светското првенство, со оваа изјава дополнително ги охрабри Англичаните, кои ќе имаат „силен ветер во грб“ до самиот крај на турнирот.
„Знаете, ако веќе Соединетите Американски Држави не можат да победат во годината кога ја слават својата 250-годишнина, тогаш би било прекрасна приказна Англичаните да дојдат во Америка и да ја освојат титулата токму за време на нашата прослава. Колку што знам, Англија чека веќе 60 години, па за нив тоа би била навистина прекрасна победа“, изјави Џулијани, откривајќи и неколку интересни детали за Трамп, кој своевремено играл голф со Хари Кејн, најголемата ѕвезда на англиската репрезентација.
„Пред неколку години бев во друштво кое играше голф со претседателот Трамп, а со нас беше и Вејн Руни. Претседателот навистина добро го разбира фудбалот, а мислам дека тоа најмногу се должи на неговиот син Барон“, раскажа Џулијани.
„Хари Кејн е најдобриот стрелец во историјата на англиската репрезентација, а доколку Англија го освои турнирот, токму тој ќе биде една од главните причини за тоа. Тој е еден од клучните играчи, а заедно со Џуд Белингем се извонредни спортисти. Англија ми изгледа како исклучително избалансиран тим. Треба да бидат полни со самодоверба, а селекторот треба да им всади уверување дека имаат потенцијал да станат светски шампиони“, заклучи Џулијани.
Во првото полуфинале, кое се игра во вторник од 21:00 часот, ќе се сретнат Шпанија и Франција, додека во второто полуфинале, во среда од 21:00 часот, силите ќе ги одмерат Англија и Аргентина.
