Разочарување при доделувањето на среброто

Камерите забележаа низа разочарани лица додека им ги врачуваа сребрените медали. Повеќето хокеарки се обидоа да останат пристојни и да задржат насмевка, но кога организаторите ги поделија минијатурните верзии на официјалната маскота на Игрите, белата ласица по име Тина, дел од нив не успеаја да ја сокријат реакцијата.

Неколку хокеарки ја погледнале кадифената играчка без многу воодушевување, а снимките набрзо станаа вирални. Особено се истакна реакцијата на Дарил Вотс – камерата ја фати како неколку секунди гледа во играчката, воздивнува, а потоа гледа во далечината, видно потресена по поразот.

Поделени реакции на интернет

Додека снимките се ширеа на социјалните мрежи, дел од луѓето пишуваа дека подарувањето кадифени играчки веднаш по поразот е целосно промашен момент. Некои коментираа дека на хокеарките требало да им се остави простор да се соземат, додека Американките го слават златото.

„Да загубиш во продолжение, па веднаш на мразот, пред камерите, да добиеш кадифена играчка за утеха е навистина ужасно“, напиша еден фан на X. „Оставете ги да тагуваат на мир“.

„Традицијата со кадифените играчки отиде предалеку“, „Ау, баш груб начин за одбележување на сребрениот медал“ и „Канада заслужи малку повеќе почит по онаквата исцрпувачка борба во продолжението“, се дел од коментарите.

Но, доделувањето кадифени играчки не е ништо ново. Освојувачите на олимписки медали обично добиваат некаква верзија на кадифена играчка, најчесто маскотата на тие Игри. Сепак, ни најслатката играчка не може да ја ублажи болката кога си толку блиску до првото злато на Зимските олимписки игри.

За Канада ова беше осми последователен меѓународен пораз од САД, кои сега имаат три олимписки злата во женскиот хокеј.