Сепак, експертите предупредуваат дека оваа вообичаена зимска активност може да биде исклучително опасна и да доведе до сериозни здравствени проблеми, вклучувајќи срцев удар, пренесе „Unilad“.

Итната помош секоја зима бележи пораст на бројот на срцеви удари и други кардиоваскуларни инциденти токму во време на обилни снежни врнежи. Главната причина лежи во комбинацијата од ненадеен и интензивен физички напор со ладно време.

Како што објаснува „Harvard Health“ проблемот е во тоа што чистењето на снегот најчесто го вршат лицата кои инаку не се физички активни.

„Земањето лопата и преместувањето многу снег, особено откако со месеци не сте правеле ништо физички, може да претставува големо оптоварување за срцето“, се наведува во нивниот извештај.

Студеното време дополнително ја влошува ситуацијата со тоа што предизвикува стеснување на крвните садови, што може да „го зголеми крвниот притисок, да го прекине протокот на крв и да ја зголеми веројатноста за згрутчување на крвта“.

Д-р Лоренс Филипс, кардиолог во Медицинскиот центар „NYU Langone“, детално го објаснил овој механизам.

„Физички, кога ќе ви стане навистина ладно, крвните садови се стеснуваат. Ова го намалува протокот на крв до вашите витални органи“, изјави тој за „The Independent“. Филипс нагласил дека чистењето на снегот никако не треба да биде почеток на вежбање за оние кои не се во форма.

„Ако не сте вежбале и не сте се напрегале долго време, тоа не е време за почеток. Количината на работа што се вложува во чистењето снег е огромна. Луѓето ја потценуваат количината на работа што ја извршуваат“, предупредил Филипс.

Тој додал дека на луѓето им е потешко да препознаат кога да престанат бидејќи тоа е активност ориентирана кон целта – чист пристап (влез).

Совети за безбедно чистење

Доколку сепак мора да го исчистите снегот, „Harvard Health“ препорачува неколку мерки на претпазливост за да го намалите ризикот:

Загрејте ги мускулите пред да започнете.

Чистете помали количини снег наместо да кревате тешки лопати.

Правете редовни паузи.

Пијте многу вода за да останете хидрирани.

Не чувствувајте притисок да го чистите секој сантиметар снег.

Веднаш влезете внатре ако почувствувате болка во градите, вртоглавица, отежнато дишење, забрзано чукање на срцето или каква било друга физичка промена што ве загрижува.