Научници од Универзитетот во Шарјах сметаат дека екстрактот од лук може да има антимикробна ефикасност слична на стандардниот антисептик што со децении се користи во ординациите и аптеките!
Авторите на систематскиот преглед, објавен во списанието „Journal of Herbal Medicine“, ги анализирале студиите во кои водата за плакнење уста направена од лук се споредува со „CHX“ – хлорхексидин, кој е еден од најчесто употребуваните антисептици во стоматологијата. По разгледување на речиси 400 научни трудови објавени до јануари 2024 година, со дополнително рачно пребарување на цитати, истражувачите ги стесниле релевантните студии на само пет – оние што ги исполнувале строгите критериуми за споредливост, рандомизирани услови и примена во реални клинички сценарија.
Резултатите се исклучително интересни: водите за уста со повисоки концентрации на екстракт од лук покажале антимикробна ефикасност споредлива со хлорхексидин. Во некои истражувања, лукот дури добил предност – му била припишана подолготрајна акциска активност, ефект што продолжува и по плакнењето, во споредба со класичната антисептичка формула.
Но, лукот не е без мани: корисниците често се жалат на печење во устата и непријатен здив по употребата. Дополнително, ефективноста зависи од концентрацијата и времетраењето на плакнењето, што значи дека не секој домашно подготвен „направи сам“ раствор може да постигне оптимален ефект, пренесува „SciTechDaily“.
Авторите нагласуваат дека, иако резултатите се охрабрувачки, постојат значајни ограничувања: мал број клинички испитувања, различни методологии и недостаток на стандардизирани протоколи. Поради тоа е неопходно да се направат дополнителни, обемни клинички студии со поголеми примероци и подолгорочно следење, доколку екстрактот од лук треба да добие место во стоматолошките препораки.
Сепак, самата идеја е привлечна – природна состојка што ја имаме во кујната, со познати антимикробни својства благодарение на соединението алицин, покажува потенцијал како алтернатива на синтетичките хемиски средства.
За секојдневна употреба, тоа не е така едноставно – непријатниот мирис и можното печење се реални недостатоци. Но, за луѓето што бараат поприродни методи за орална хигиена, со добра формулација и правилна примена, растворот на база на лук може да има смисла.
Истражувањето носи основана надеж дека во иднина би можеле да добиеме природна, билна алтернатива на хемиските антисептици – но за тоа ќе бидат потребни дополнителни докази и многу повеќе работа.
