Атмосферата во градот беше електрична: од дебито на креативните директори во големите модни куќи до трогателното збогување со една од најславните фигури на италијанската мода – легендарниот Џорџо Армани.

Програмата ја отвори Демна, дизајнер со грузиско потекло, познат по своите провокативни потези во „Balenciaga“. Неговото доаѓање во модната куќа „Gucci“ предизвика вистинска бура од очекувања, а наместо типична ревија, се одлучи за уметнички потег – интимна проекција на краткиот филм „Tiger“, во режија на Спајк Џонз и Халина Рејн. Со тој гест, Демна навести дека „Gucci“ влегува во нова, интроспективна и концептуална ера.

Само ден подоцна, во седиштето на „Jil Sander“ во Милано, публиката беше сведок на смена на генерации. По една деценија во која брендот го водеа Лук и Луси Мајер, кормилото го презеде Симон Белоти. Неговата прва колекција покажа дека има намера да изгради мост меѓу препознатливиот минимализам на брендот и сè понагласената потреба за топлина и флуидност во современиот дизајн.

Еден од најочекуваните моменти беше и дебито на Дарио Витале во „Versace“, кое го подели модниот свет. Поранешниот член на креативниот тим на „Miu Miu“ приреди спектакл во величествената Пинакотека Амброзијана. Колекцијата беше враќање кон дизајнот од осумдесеттите и деведесеттите години, времето кога Џани Версаче создаваше.

Од друга страна, Луиз Тротер, една од ретките жени поставени на чело на голем италијански бренд, дебитираше во „Bottega Veneta“. Нејзината визија донесе ново чувство на софистицираност, спојувајќи луксуз и секојдневна носливост, што публиката го дочека со одобрување. Оваа колекција внесе силен женски печат во сезона полна со големи машки имиња.

Покрај смените и дебитантите, постојаните играчи на миланската модна сцена – „Prada“, „Dolce & Gabbana“, „Missoni“, „Ferragamo“ и „Fendi“ – ги одржаа своите раскошни ревии, потврдувајќи го статусот на креатори на спектакли.

Во морето нови почетоци, најемотивниот момент беше збогувањето со Џорџо Армани, кој почина на 4 септември, на 91-годишна возраст. Специјалната ревија во негова чест не беше само моден настан, туку и историски момент – омаж на визионерот кој ја редефинираше елеганцијата и италијанскиот стил за цели генерации. Публиката ја испрати легендата со стоечки овации.

Да, и да не заборавиме – по речиси дваесет години, на ревијата се појави никој друг туку Миранда Пристли лично, заедно со нејзиниот моден директор Најџел Киплинг. Заедно присуствуваа на ревијата на „Dolce & Gabbana“, внимателно следејќи ја и проценувајќи ги манекенките. Ревијата всушност послужи како сценографија за претстојното продолжение на филмот „The Devil Wears Prada 2“, а Мерил Стрип и Стенли Тучи повторно ги толкуваат улогите кои станаа култни.

Ревии кои најмногу се истакнаа

„Giorgio Armani“

На пистата се нижеа модели во класичен Армани стил: лежерни кроеви на сакоа, широки панталони што го следат движењето, туники, елеци и меки ткаенини кои делуваат како продолжение на телото. Палетата на бои се движеше од тонови на песок и беж нијанси до суптилни премини на сина и зелена, создавајќи атмосфера на мирна, речиси медитеранска леснотија.

„Bottega Veneta“

Во своето прво претставување пред модниот свет, Луиз Тротер се инспирираше од ликот и делото на Лаура Браџион – првата жена на позицијата креативен директор на куќата за време на осумдесеттите и деведесеттите години, чие име останало во сенка на историјата.

На пистата се редеа строги кроеви: предимензионирани палта, кошули со високи јаки и варијации на вечерни костуми, со вибрантни фустани и здолништа исткаени од илјадници сјајни нишки.

„Prada“

Мјуча Прада и Раф Симонс продолжија да истражуваат како модата може да одговори на хаотичната реалност на дигиталната ера.

Колекцијата почна од униформата: војнички кошули со еполети, наборени панталони и кожни чевли. Но наместо крутост, дизајнерите во таа рамка внеле слобода преку раскошни оперски ракавици, кристални детали, волуменозни слоеви од тафт и здолништа составени како колаж од набори и карнери.

Трендови

Лесно и слоевито

Иако слоевитото облекување традиционално е резервирано за есенско-зимската сезона, овие лесни слоеви сигурно ќе ви го освојат срцето. Лесното слоевито облекување спојува прозрачни материјали и проѕирни ткаенини, создавајќи чувство на леснотија и слобода. Слоевите се носат така што телото изгледа обвиено, но никогаш оптоварено.

Меки капути

Капутите изработени од меки, пердувести материјали или кадифе во интензивни бои, впечатливи принтови или силно изразени кроеви, се издвојуваат како клучни парчиња од Миланската модна недела. Очигледно е дека дизајнерите решија да пренесат дел од класичните елементи на есен-зимата во пролетно-летната сезона.

Дистописки строго скроени костуми

Строго скроени костуми и мантили во сива палета, инспирирани од дистописки филмови, се чини дека беа комбинацијата која ги маѓепса дизајнерите. Мјуча Прада креираше вакви дистописки костуми како креативен одговор на сè поголемата неизвесност што го одбележува нашето секојдневие. Сè изгледа практично и заштитнички – како да нè брани од нешто што се заканува. Линиите се остри и прецизни, а естетиката е студена и футуристичка, повикувајќи на чувство на сигурност и контрола.