Полицијата ширум светот се бори против кражби на возила, но еден човек успеа во нешто што звучи речиси неверојатно: со помош на вештачка интелигенција го пронашол својот автомобил.

Станува збор за „Lamborghini Huracan EVO“, за кој се верувало дека е украден пред две години.

Ендру Гарсија од округот Оринџ мислел дека неговиот „Lamborghini“ засекогаш исчезнал. Според наводите, возилото го украла организирана криминална група која се занимава со кражби на луксузни автомобили.

Криминалците изнајмувале возила, никогаш не ги враќале, а потоа со манипулација на документацијата го префрлале сопствеништвото и ги препродавале, пишува „CarScoops“.

Мистериозна порака

За Гарсија, денот кога исчезнал автомобилот бил катастрофален.

„Плачев“, изјавил тој за моментот кога дознал дека возилото исчезнало.

„Тоа беше удар, многу фрустрирачки“, додал во изјава за „CBS8“.

И додека некои сопственици на автомобили украдени од истата група успеале да си ги вратат возилата, „Lamborghini“-то на Гарсија останало недостапно – сè додека не пристигнала чудна порака на „Instagram“.

„Дали го продадовте овој автомобил?“, стоело во пораката, заедно со нови фотографии од возилото.

Се претпоставува дека лицето што го контактирало Гарсија ја пронашло неговата визит-карта во автомобилот и помислило дека на тој начин може да дојде до уште луксузни возила.

Наместо веднаш да го пријави случајот во полиција, Гарсија одлучил сам да истражи. Фотографиите ги внел во „ChatGPT“, ги поврзал со алатките на „Google“ за лоцирање и успеал да собере доволно информации за да ја открие локацијата на автомобилот.

Трагата го одвела до Денвер, Колорадо, каде што ја известил полицијата. Тамошните власти го пронашле возилото и потврдиле дека навистина се работи за неговиот одамна изгубен „Huracan“.

Истражувањето продолжува

Кејл Гоулд, портпарол на Агенцијата за превенција на кражби на возила во Колорадо, ја пофалил неконвенционалната истрага: „Ваквиот проактивен пристап кон прибирање информации навистина може да помогне во пронаоѓањето на украдени возила.“

Истражувањето за тоа во чија сопственост бил автомобилот во Колорадо сè уште трае, а полицијата допрва треба да соопшти дали смета дека тие лица се вмешани и во самата кражба.

Во меѓувреме, дел од осомничените за кражбите во Калифорнија веќе се соочуваат со последици. Еден е прогласен за виновен и чека изрекување казна за кражба и проневера, додека судењето за друг е закажано за октомври.