Но, тоа може да биде погрешен пристап, предупреди клиничкиот психолог Беки Кенеди, пишува „CNBC“.

Со постојаните обиди да ја отстраните секоја непријатна емоција, всушност му отежнувате на детето да развие отпорност. Така станува помалку подготвено да се справи со предизвиците што допрва доаѓаат, објасни Кенеди, која дипломирала на Универзитетот Колумбија и е мајка на три деца.

Наместо да бидете „суперхерој“ кој ги решава сите проблеми, вашата улога е да го поддржите, охрабрите и да бидете тука за детето додека поминува низ тешки моменти.

„Работата на родителот не е да го усреќи детето или да отстрани секоја пречка од неговиот пат“, истакна Кенеди, авторка на популарниот поткаст за родители „Good Inside“. „Нашата задача е кај детето да ги видиме способностите што тоа не ги гледа во тој момент“, додаде таа.

Учење преку фрустрација

Децата учат и напредуваат токму преку грешки, неуспеси и моменти кога не го добиваат она што го сакаат. Ако постојано се обидувате да ги развеселите, им ја одземате можноста да научат како да се справат со цела низа емоции.

„Учењето е хаотично. Вклучува грешки, реченици како „Не можам да го направам тоа“ или „Не сум добар во ова“. Ако премногу се мешаме, ги лишуваме од можноста сами да откријат колку се всушност способни“, истакна Кенеди.

Пример од пракса – домашна задача

Кога детето се бори со математичка задача, дозволете му само да го пронајде решението. Може да плаче, да се налути или да ве моли да го направите тоа наместо него. Кенеди предлага одговор кој звучи приближно вака:

„Во право си, оваа задача е тешка. И е тешка токму затоа што е тешка. Можам да бидам покрај тебе, да ја проверам твојата работа, но нема да ја решам наместо тебе затоа што знам дека можеш сам/а. Верувам во тебе. Ќе го надминеме ова заедно“.

Овој пристап ги потврдува чувствата на детето, но во исто време го учи како самостојно да се справува со проблемите и да верува во сопствените способности.

Долгорочна корист

Според развојниот психолог Ализа Пресман, токму оваа внатрешна верба во сопствените способности е клучна за успех и емоционална стабилност во зрелоста. Кога децата ќе разберат дека неуспесите не се доказ за трајни ограничувања, туку можност за напредување, тие ќе можат полесно да се справат со идните предизвици.

Што да очекувате кога ќе го промените вашиот пристап

Ако често сте попуштале на детските солзи или испади на бес, промената на вашиот пристап нема секогаш да биде едноставна. Но, Кенеди тврди дека резултатите брзо се видливи – детето ќе стане поотпорно, а вие ќе станете помирни во справувањето со неговите фрустрации. Со текот на времето, тоа сè помалку ќе бара ваше решение, а сè повеќе ќе верува во своето.

„Нашите зборови стануваат мисли на детето за самото себе“, заклучи Кенеди. „Кога постојано му велите: „Ова е тешко, но можеш да ги надминеш тешките работи“, ќе дојде денот кога тоа самото ќе си го повтори истото“, додаде психологот.