Компанијата се наоѓа на опасна падина. Во само неколку месеци, "Apple" изгуби повеќе од 630 милијарди долари пазарна вредност, додека конкурентите агресивно напредуваат во полето на вештачката интелигенција (AI). Инвеститорите и аналитичарите сè почесто се прашуваат – дали Тим Кук, човекот кој со години го одржуваше "Apple" на врвот, сега станува пречка за понатамошниот раст?

Додека други технолошки компании ги насочуваат сите сили кон иновации во "AI", "Apple" делува затекнато. Веќе не е доволно да имате најпродаван телефон на светот – светот бара „паметни“ уреди, поперсонализирано искуство и визија за иднината што оди подалеку од хардверот.

„На "Apple" му треба визионер, не менаџер“

Во коментар што одекна на Волстрит, аналитичарите Волтер Пајсек и Џо Гелон од "LightShed Partners" порачаа: „Apple повеќе не може да си дозволи пасивност. Време е за промена на врвот.“ Според нив, на компанијата ѝ е потребен лидер што ги разбира производите, не само логистиката.

Тие нагласуваат дека Тим Кук бил вистинскиот избор во моментот кога го наследи Стив Џобс, но новата ера бара нова енергија – некој што ќе донесе радикални чекори, особено во областа на вештачката интелигенција, која ги менува правилата на игра во технолошката индустрија.

"Meta" се обидува да „украде“ клучен човек од "Apple"

Дополнителна несигурност носи најавата за заминување на главниот оперативен директор Џеф Вилијамс, кој со години важеше за наследник на Кук. Него ќе го замени Сабих Кан, а сè повеќе се зборува дека Џон Тернус, шеф на хардверскиот инженеринг, би можел да биде следниот "CEO".

Во меѓувреме, "Meta" се обидува да го направи „трансферот на сезоната“ – нудејќи му на Вилијамс пакет вреден над 200 милиони долари за да го придобие. Овој потег многу зборува за тоа колку сериозно конкурентите ја гледаат внатрешната нестабилност на "Apple".

"Apple" заостанува во "AI" трката: Каде се големите аквизиции?

Додека "Google" и "Meta" инвестираат милијарди во "AI" стартапи и платформи, "Apple" и понатаму делува резервирано. Нивната најголема аквизиција и понатаму останува купувањето на "Beats" за 3 милијарди долари – во 2014 година. За споредба, "Meta" неодамна инвестираше 14,8 милијарди долари во "Scale AI", додека "Google" издвојуваше дури 32 милијарди за безбедносниот стартап "Wiz".

Аналитичарите и инвеститорите прашуваат: каде се големите купувања на "Apple"? Ако сака да остане конкурентен, "Apple" ќе мора да ризикува и да покаже амбиција што ги надминува досегашните рамки.

Визија или статус-кво: Одлучувачки момент за "Apple"

Под водство на Тим Кук, "Apple" постигна фасцинантен раст – акциите на компанијата пораснаа за над 1.400% од неговото доаѓање во 2011 година. Но успехот од минатото не е гаранција за иднината – особено не во свет што се менува од ден во ден.

Со оглед на брзината со која се развива "AI" технологијата и со конкуренцијата што не мирува, "Apple" мора да одлучи – дали ќе остане симбол на иновацијата или ќе стане технолошки гигант што го губи чекорот? Следните потези би можеле да ја одредат не само иднината на "Apple", туку и целата технолошка индустрија.