Мокрењето во море додека се плива не е ништо невообичаено. Но, помалку е познато дека тоа може да има негативно влијание врз животната средина. Ана Бјерн, биолог и раководител на одделот во Научниот центар за Балтичко Море во Стокхолм, смета дека сите треба да престанат да уринираат во морето: „Тоа можеби изгледа како капка во море, но има големо локално влијание.“
Урината е богата со лесно достапни хранливи материи, што самото по себе не е штетно – напротив, тие хранливи материи се корисни за природата. Проблемот настанува кога доаѓа до преголемо внесување на хранливи материи, што доведува до прекумерен раст на одредени организми, пренесува Шведската радио-телевизија.
Морето тешко ги апсорбира хранливите материи од човечки урина
Иако може да изгледа како ситен чекор, прекинот на мокрењето во вода има значително локално влијание, според Ана Бјерн. „Еден литар урина храни од пет до седум килограми алги. Ако една личност уринира во вода, тоа не е голем проблем, но во мал залив каде што често се плива, тоа може да остави последици на долг рок.“
Морето тешко ги разградува хранливите материи од човечката урина. Затоа, според Бјерн, подобро е да се излезе на копно и таму да се уринира – бидејќи копнената флора има корист од тие материи. Посебно ситновлакнестите алги се оние што се хранат со урина. Тие брзо растат и се лепат за други живи организми, што го нарушува природниот екосистем.
Бјерн објаснува дека нивниот раст особено им отежнува живот на други видови, како што е меурестата алга. Таа апсорбира светлина и хранливи материи со целата своја површина и ѝ се потребни мазни подлоги за нејзините оплодени јајца да се залепат. Тој природен процес се нарушува од присуството на ситновлакнести алги кои создаваат слоеви на другите алги и морското дно.
Забрана за празнење тоалети на бродови
Во Балтичкото Море од 2015 година е забрането празнење на бродски тоалети во отворено море. За сопствениците на бродови без резервоари за отпадни води, Бјерн има практичен совет: „Мокрете во кофа и однесете ја на копно.“
Секој може – и треба – да преземе одговорност
Прекумерното внесување хранливи материи во Балтичкото Море доаѓа од многу други извори освен човечката урина. Земјоделството и сечата на шуми, според Бјерн, се поголем фактор во проблемот отколку самиот урина.
„Нема причина да не преземеме акција само затоа што се работи за мала работа. Истото како што мора да ги намалиме големите извори на загадување, така можеме и самите да направиме нешто мало. И тоа мало има значење во природата“, заклучува Ана Бјерн, додавајќи дека секој може – и треба – да преземе поголема одговорност.
