„Целата историја на Милан тагува по смртта на Франко Барези. Неговиот пример и интегритет засекогаш ќе останат вткаени во ДНК-та на клубот, исто како и неговиот култен дрес со бројот 6. Сочувството што Милан во овие тешки моменти му го упатува на семејството на Франко Барези го делат сите Росонери, кои оваа загуба ја чувствуваат како своја“, објавија од Милан.

Барези околу една година се бореше со болест, откако беше подложен на операција на белите дробови и имунотерапија. Милан уште во средата навечер ги демантираше лажните гласини за смртта на Барези, но потврди дека минува низ „чувствителен период“. Неполни два дена подоцна, Барези почина.

Симбол на Милан

Франко Барези е роден на 8 мај 1960 година во Траваљато, во близина на Бреша, а речиси целиот свој фудбалски живот го врза за Милан. Во првиот тим влезе како тинејџер, а за Росонерите дебитираше во 1978 година. Во клубот остана цели 20 сезони, вклучително и во тешките години на почетокот на 1980-тите, кога Милан двапати испадна во Серија Б. Ниту тогаш не го напушти клубот, а со текот на времето стана негов капитен, симбол и еден од најголемите играчи во историјата.

Како либеро и централен дефанзивец, тој беше заштитен знак на големиот Милан од крајот на 1980-тите и почетокот на 1990-тите. Посебен белег остави во тимот на Ариго Саки, а потоа и кај Фабио Капело, играјќи во легендарната одбрана заедно со Паоло Малдини, Алесандро Костакурта и Мауро Тасоти.

Со Милан освои шест титули шампион на Италија и три пати стана европски шампион – во 1989, 1990 и 1994 година. Вкупно одигра повеќе од 700 официјални натпревари за Милан, а во 1989 година заврши втор во изборот за „Златната топка“, зад својот соиграч Марко ван Бастен.

Остави длабока трага и во репрезентацијата на Италија. Беше дел од селекцијата која во 1982 година стана светски шампион, иако на тој турнир не настапи, а подоцна стана и капитен на репрезентацијата. На Светското првенство во 1994 година доживеа тешка повреда на коленото во групната фаза, но неверојатно брзо се врати и одигра извонредно финале против Бразил. Италија го загуби натпреварот по изведување пенали, а токму Барези го промаши првиот пенал за својата репрезентација. За Италија одигра 81 натпревар.

Кариерата ја заврши во 1997 година, по што Милан го повлече неговиот дрес со бројот 6 – чест што најдобро го потврдува неговиот статус во историјата на клубот.