Челниците на Олимписките игри, односно претставниците на Меѓународниот олимписки комитет (МОК), донесоа одлука дека Јута Лирдам може да продолжи со контроверзното раскопчување на горниот дел од опремата за да ја покаже долната облека и на тој начин дополнително да заработи.
Холандската ѕвезда во брзо лизгање Јута Лирдам со своето карактеристично раскопчување на оделото привлече големо внимание. Тоа го прави во маркетиншки цели, за на својата долна облека да го прикаже симболот на производителот на спортска опрема „Nike“.
Иако Холандскиот сојуз за брзо лизгање соработува со брендот „FILA“, неа приватно ја спонзорира „Nike“. Така, под нејзиното аеродинамично тркачко одело беше видлив спортскиот градник на американскиот производител, а по минувањето низ целта редоследот беше јасен – прво да се откопча оделото.
Според проценките на експертите за спортски маркетинг, Лирдам од „Nike“ наводно заработува околу 850.000 евра годишно. Дополнително, секоја спонзорирана објава на Инстаграм може да ѝ донесе околу еден цент по следбеник, што е приближно 62.000 евра по објава во која се појавува „Nike“ или друг партнер.
Од Меѓународниот олимписки комитет се огласија и потврдија дека Јута нема да сноси никакви последици. Нема да биде финансиски казнета, така што може да продолжи со оваа практика.
„Не сум експерт за уметничко лизгање, но разбирам дека раскопчувањето на оделото по натпревар е нормално за лизгачите. Особено затоа што оделото е многу тесно. Тоа е вообичаена практика, а не маркетиншки трик“, изјави Ан-Софи Вумар, директорка за маркетинг на МОК.
Дополнителен маркетиншки поттик ѝ дава и врската со инфлуенсерот и боксер Џејк Пол, кој има речиси 29 милиони следбеници на Инстаграм. Кога промотивните објави ќе се појават и на неговиот профил, досегот повеќекратно се зголемува.
Да потсетиме, на Зимските олимписки игри во Кортина и Милано Јута Лирдам освои злато на 1.000 метри и сребро на 500 метри.
