Косата ја бојадисуваме од различни причини, а во секој случај, тоа е прилично брз и едноставен начин да бидеме позадоволни од својот изглед.

Сепак, често се занемарува дека оваа техника за разубавување подразбира нанесување хемикалии на главата, што значи дека бојата влијае и на косата и на кожата и може да предизвика алергиски реакции. Но, дали и колку фарбите за коса навистина се штетни? Што е најопасно? Колку често смееме да се фарбаме? Може ли исхраната да помогне?

Дерматологот д-р Жао Жаоминг за „Vogue Arabia“ се обидел да одговори на овие прашања.

Бојадисувањето на косата треба да се ограничи на четири пати годишно

Како што истакнал тој, најдобро е косата да се бојадисува еднаш на три месеци, односно најмногу четири пати годишно.

„Бидејќи боите содржат многу хемиски компоненти, токсичноста на металите и апсорпцијата преку кожата можат да предизвикаат реакција — може да се појават црвенило, чешање и други форми на алергиски контактен дерматитис“, објаснил д-р Жао Жаоминг. „Многу студии, исто така, укажуваат дека бојадисувањето на косата може да го зголеми ризикот од карцином на уринарниот тракт, па затоа треба да се биде внимателен и да се внимава на зачестеноста на фарбањето“, додал тој.

Некои постари студии укажуваат на оваа поврзаност, но поголеми истражувања и мета-анализи не пронашле доследна и причинско-последична поврзаност меѓу фарбањето и ракот на уринарниот тракт. Со други зборови, малку е веројатно дека умерената употреба на боја за коса ќе претставува значајна закана за здравјето.

Заштитете ја кожата на скалпот при бојадисување

Колку почесто се бојадисува косата, толку е поголем ризикот за скалпот. Д-р Жаоминг предупредил дека посветлите нијанси бараат нанесување повеќе слоеви хемикалии, што го зголемува ризикот од оштетување. Пред да започнете со бојадисување, се препорачува скалпот да се заштити со лосион, да се избегнува употреба на производи со непознато потекло и бојата да се нанесува внимателно. Особено е важно да се избегнува контакт со кожата зад ушите, на вратот или на лицето.

„Силниот мирис на некои бои може да ги иритира дишните патишта и да предизвика алергиски реакции или астма, па затоа е потребна посебна претпазливост“, додал д-р Жаоминг.

Пијте вода и витамин Ц

Секако, еден третман во фризерски салон нема да ви го наруши здравјето, но овој дерматолог советува по бојадисувањето да се зголеми внесот на вода и да се консумира витамин Ц.

Без разлика дали му верувате на д-р Жао Жаоминг или не, ова секако е добар совет и за општото здравје и за убава коса, бидејќи редовната хидратација е многу важна за здрава коса склона кон сушење, додека витаминот Ц е моќен антиоксиданс кој ги штити фоликулите од оштетување од слободните радикали, ја зајакнува косата и го поттикнува создавањето колаген.