Амбасадор тортата е класик што не се заборава и никогаш не излегува од мода. Самото име говори дека е важна и ценета, токму како функцијата на амбасадор било каде во светот.

Една од најубавите и највкусните торти со ореви, лешници и чоколадо. Слој по слој, вистински домашен десерт што се топи во устата! Сиот раскош на оваа посластица е претставен на Јутјуб каналот „ Deda Miletova Kuhinja “. Ако ги сакате богатите и кремасти десерти, Амбасадор тортата ќе ве воодушеви!

Амбасадор торта на дедо Миле

Потребно е:

За кори:

• 10 белки;

• 10 лажици шеќер;

• 150 г крупно сечкани ореви;

• 50 г крупно сечкани лешници;

• 2 лажици какао.

За фил:

• 20 жолчки;

• 13 лажици шеќер;

• 375 г путер;

• 100 г мелен орев;

• 150 г чоколадо за готвење.

Подготовка:

За кората прво се матат белките до цврст снег, потоа постепено додавајте шеќер и матете додека смесата не стане густа и сјајна. Кога снегот е подготвен, со лажица внимателно измешајте ги сечканите ореви, лешници и какаото, водејќи сметка масата да остане воздушеста. Најдобро е да печете две кори, па секоја да ја пресечете по должина за да добиете четири слоја.

Смесата истурете ја во плех обложен со хартија за печење и печете на 170 степени додека кората не стане сува на допир. Кога целосно ќе се излади, секоја кора пресечете ја по должина.

За филот пенасто изматете жолчки со шеќер и гответе на пареа додека не згуснат и не осветлат, а потоа оставете целосно да се изладат. Путерот на собна температура изматете го посебно, па постепено додајте го изладениот жолт крем и добро изедначете.

За темниот фил стопете чоколадо и измешајте го во половина од филот, а во другата половина жолт фил додадете мелените ореви.

Тортата се реди така што на кората прво се нанесува чоколадниот фил, врз него оди жолт фил со ореви, потоа постапката се повторува со секоја кора. Завршниот слој може да биде светлиот фил или по желба можат да се комбинираат и двата.