Повеќе од 300 срни неодамна биле спасени од замрзнати езера во рускиот регион Новосибирск, соопшти локалното Министерство за природа.
Животните не можеле да се движат по лизгавата површина на замрзнатите водни површини за време на нивната миграција, која започнала неколку месеци порано оваа година, пишува „Euronews“.
Сибирските срни обично мигрираат од планинските области на соседните Алтајски региони во јануари, кога снегот таму станува премногу длабок. Тогаш замрзнатите езера и реки во регионот Новосибирск се покриени со снег, па затоа копитарите лесно се движат.
Рибарите во областа Карасуки минатата недела пронашле околу 30 заробени животни на мразот на езерото Черноје.
За да ги спасат од сигурна смрт, тие морале да носат по едно животно, тешко до 40 килограми, на рамената и да го влечат на санка до најблискиот брег. Спасувачката акција била тешка, бидејќи срните се плашливи животни и пружале активен отпор, додека некои од спасителите дури и ги каснале.
Еден од рибарите, Иља Зајцев, ја снимил спасувачката акција и ја објавил на својот Јутјуб канал.
„Искрено, сцената е многу страшна. Тие лежат и врескаат. Оние што седат се добро, но гледам една како лежи, најверојатно е мртва“, рекол Зајцев.
Локалното Министерство за природа соопшти дека членовите на Министерството за вонредни ситуации користеле и ховеркрафт (лебдилка) за да го спасат заробеното стадо и потврди дека не преживеале сите срни, но дека повеќето биле спасени.
