Ран претходник на „Urus“ со фасцинантна историја.
Уникатниот „Lamborghini LM002“, караван од 1986 година често се опишува како вистинскиот претходник на моделот „Urus“.
Првично бил испорачан на султанот од Брунеј, но стандардниот "LM002" не бил доволно практичен, па во 1989 година италијанскиот мајстор за каросерии Салваторе Диоманте го претворил овој „Rambo Lambo“ во продолжен караван со покачен покрив, пространа задна клупа и дури телевизор.
По Брунеј, автомобилот завршил кај Бернд Пишекридер, поранешен прв човек на „BMW“ и „VW“, а во 2012 бил увезен во Шведска, каде што третиот сопственик наводно го користел за возење на децата на училиште.
Возилото денес е во сребрена боја со благ патиниран изглед, но сè уште го има оригиналниот 5.2-литарски V12 мотор од моделот „Countach“, обновен во 2024 година, кој развива 449 коњски сили, во комбинација со рачен менувач „ZF“ и погон на сите четири тркала со три блокади на диференцијал.
Внатрешноста зрачи со стилот на осумдесеттите, со црна кожа, широка задна клупа и ретро мултимедија.
Поминал само 11.000 километри, а овој единствен "LM002" моментално е на аукција организирана од „Bring a Trailer“, каде што се очекува цена споредлива со современ „Urus“.
