[ФОТО] Модерна куќа во Нови Сад има необично решение за соседите кои имаат интересно хоби – да гледаат во вашиот дом од своите прозорци

Со проектирање на еден вид чипка од тули која ја крие белата фасада и отворите во зоната на првиот кат, архитектите од студиото „a2arhitektura“ успеале да го исполнат барањето и воедно да ѝ дадат на куќата многу впечатлив идентитет, пишува „Super Prostor“.

На овој начин, иако повлечена во однос на регуларната линија на улицата, куќата VU ја следи таа граница и визуелно се вклопува во низа соседни објекти.

Внатрешниот двор се надоврзува на ентериерот преку големи стаклени врати и е изолиран од погледи со цел семејството во него да може спокојно да го поминува слободното време.

Со оглед на тоа што куќата е ориентирана во правец север-југ, поголем доток на природна светлина се обезбедува со воведување на страничен атриум и непробојна тераса, како и тесни застаклени процепи на источната и западната страна.

Просторот е поделен на дневна зона на приземје и ноќна зона на кат.

Добар дел од станбениот простор е дизајниран како единствен, отворен простор. Неутралните и светли тонови, како и погледот на внатрешниот двор придонесуваат за чувството на пространост и удобност. На приземјето има и гардеробер, работна соба, тоалет, како и просторија за складирање и техничка просторија, до која се пристапува однадвор.

На катот се проектирани две одвоени целини – родителска и детска зона, поврзани со мост.

Родителскиот дел се состои од спална соба со излез на балкон, делумно оградена со чипка од тули, потоа мастер бања со туш-кабина и хидромасажна када, како и гардероба, вежбална и сауна.

Детските спални се флексибилно дизајнирани за да можат да формираат уникатен простор, а со употреба на лизгачки врати стануваат три посебни соби.

Децата имаат посебен тоалет и тераса со поглед на дворот која ја делат сите три соби, додека едната има и излез кон чардак.