Холивудската актерка Селма Блер, позната по улогите во филмовите „Cruel Intentions“ и „Hellboy“, е уапсена по инцидент на летот на компанијата „Delta Air Lines“ од Лос Анџелес до Њујорк. Педесет и четиригодишната актерка се најде во центарот на полициска истрага откако членовите на кабинскиот персонал пријавиле дека една патничка физички ги нападнала за време на патувањето, а подоцна било утврдено дека станува збор токму за неа.
Според соопштението на полицијата на Њујорк и Њу Џерси, инцидентот се случил во неделата навечер, на 11 октомври, а актерката била приведена по слетувањето на авионот на меѓународниот аеродром „Џон Ф. Кенеди“ во Њујорк. Две стјуардеси пријавиле повреди, поради што на едната ѝ била потребна болничка помош. По интервенцијата на полицијата, и Селма била пренесена во здравствена установа за лекарите да ја проценат нејзината состојба.
Откриено што му претходело на инцидентот во авионот
Откако веста за апсењето се прошири во јавноста, се огласи претставникот на славната актерка, кој изнесе поинаква слика за настаните и нагласи дека Селма за време на летот доживеала сериозна здравствена криза. Како што објасни, актерката во претходните денови била изложена на големи физички напори поради работните обврски, а нејзината состојба дополнително се влошила по несреќата во авионот.
„Селма доживеа здравствена криза што доведе до наведеното однесување. Г-ѓа Блер се качи на овој лет откако претходно била на снимање, каде што со денови работела исклучително долго и исцрпувачки. За време на летот се случи и инцидент во кој Селма падна и ја удри главата. Овие фактори, во комбинација со височината на која летал авионот, доведоа до состојба на тешка збунетост и дезориентираност. Веднаш по слетувањето ѝ беше укажана медицинска помош и во моментов е во стабилна состојба“, изјави Барнс.
Потресни сцени во судницата, актерката не можела да ги задржи солзите
Случајот набрзо доби и судски епилог, а појавувањето на Селма Блер пред судијката поминало во многу емотивна атмосфера. Судијката Индира Кан ѝ одредила на актерката кауција од 20.000 долари во готовина, односно дополнителни 60.000 долари во форма на гаранција. Иако нејзините адвокати побарале да ѝ бидат симнати лисиците за време на сослушувањето, судијката не го прифатила тоа барање, па холивудската ѕвезда морала да ги носи лисиците целото време додека била во судницата.
Дека целата ситуација ѝ паѓа исклучително тешко, станало јасно уште при нејзиното влегување во судницата. Селма не успеала да ги совлада емоциите, а нејзиниот адвокат Џошуа Рајцас ѝ пришол и ѝ ги избришал солзите, што дополнително го привлекло вниманието на присутните.
Блер треба повторно да се појави пред судот на 19 јануари. Доколку биде прогласена за виновна по обвиненијата според законите на сојузната држава, би можела да се соочи со затворска казна од две до седум години, изјави обвинител во понеделникот.
Селма Блер со години се бори со сериозна болест
Познатата актерка со години отворено зборува за здравствените проблеми со кои се соочува. Во 2018 година ѝ била дијагностицирана мултиплекс склероза, хронична болест што го зафаќа централниот нервен систем и може сериозно да влијае врз секојдневното функционирање.
Селма никогаш не криела колку дијагнозата ѝ го променила животот, а за својата борба често зборувала јавно, настојувајќи да ја подигне свеста за предизвиците со кои се соочуваат луѓето заболени од мултиплекс склероза.
Сепак, засега не е потврдено дали нејзината основна болест имала каква било улога во инцидентот на летот. Нејзиниот претставник го поврзал однесувањето на актерката со исцрпеноста, повредата на главата и здравствената криза што ја доживеала за време на патувањето.
