Актерот Хју Џекман е роден на денешен ден, 12 октомври 1968 година, во Сиднеј, како најмлад од петте деца. Неговите родители дошле од Англија во Австралија непосредно пред раѓањето на Хју и, како што актерот раскажал во повеќе наврати, го воспитувале напорно да работи и да се стреми кон образование.
Сепак, кога Хју имал само осум години, неговата мајка одлучила дека животот во Сиднеј не е за неа и се вратила во Англија со своите ќерки. Хју и неговите двајца браќа останале да живеат со татко им, кој никако не можел да се помири со фактот дека сопругата го напуштила. Пет години по нејзиното заминување, и тој заминал во Англија за да може да биде со неа.
Хју подоцна, во гимназијата, ја открил својата љубов кон глумата, па по завршувањето на средното училиште се запишал на Академијата за сценски уметности на Западна Австралија. Џекман таму настапувал во бројни театарски претстави, а неговиот талент не останал незабележан, па добил улога во познатата австралиска серија „Correlli“. По оваа улога, станал забележлив и во Холивуд, па набргу добил понуда да се пријави на аудиција за улогата на Вулверин во филмскиот серијал „X-Men“.
Како што е познато, ја добил улогата, а токму ова остварување го вивна меѓу ѕвездите. За време на снимањето на серијата „Correlli“ ја запознал и Дебора Ли-Фернес, која е 13 години постара од него, а со која се оженил во 1996 година. За време на бракот посвоиле две деца, синот Оскар Максимилијан и ќерката Ава Елиот.
Иако важеа за еден од најскладните парови во Холивуд и за многумина беа пример за „совршена љубов“, Хју и Дебора неодамна ги изненадија сите со објавата дека одлучиле да се разведат. „Бевме благословени што можевме да споделиме речиси три децении заедно како сопруг и сопруга во прекрасен брак исполнет со љубов. Нашето заедничко патување сега завршува и одлучивме да се разделиме, со желба да продолжиме со сопствениот личен развој“, стои на почетокот од изјавата, пренесува „People“.
„Нашето семејство отсекогаш било и секогаш ќе биде наш најголем приоритет. Новото поглавје го започнуваме со благодарност, љубов и љубезност. Многу ја цениме вашата поддршка и разбирање за нашата желба да ја зачуваме приватноста во моменти кога нашето семејство минува низ оваа промена што се случува во животот на сите нас. Деб и Хју Џекман“, пишува на крајот од соопштението, а парот потоа истакнал дека ова е „единствената официјална изјава на оваа тема што кој било од нив двајца ќе ја даде“.
Џекман пред извесно време имал и рак на кожата, а неодамна соопшти и дека повторно му биле направени анализи.
„Еј, луѓе. Сакав ова да го слушнете од мене. Тукушто ми направија две биопсии. Резултатите од испитувањата ги очекувам за неколку дена. Само сакам да ве потсетам дека базоцелуларниот карцином е најмалку опасен, но се надевам дека ова ќе ве поттикне да се заштитите од сонцето“, рекол актерот.
Некои од најзначајните улоги Хју Џекман ги одигра во остварувања како што се „X-Men“, „Kate & Leopold“, „Swordfish“, „Van Helsing“, „The Prestige“, „The Fountain“, „Australia“, „Rise of the Guardians“, „The Wolverine“, „Les Misérables“, „Deadpool 2“ и „Deadpool 3“, како и во други филмови.
