Американските пејачи Ашер и Крис Браун откажаа четири концерти од нивната заедничка стадионска турнеја „R&B Tour“.
Организаторот како причина ги наведува здравјето и благосостојбата на изведувачите и екипата по долгата низа настапи. Сепак, откажувањата временски се совпаѓаат со обврските на Браун пред судот во Лондон, каде што на 26 октомври треба да му биде изречена пресудата, но нема официјална потврда дека овие два настани се поврзани.
Според пишувањето на локалната телевизија „WIS“, датумите во петокот биле отстранети од официјалната страница на турнејата, а „Ticketmaster“ ги известил купувачите на билети дека организаторот морал да го откаже настанот.
Откажани се настапите во Балтимор, на стадионот „M&T Bank“, на 17 октомври, во Синсинати, на стадионот „Paycor“, на 24 октомври, во Колумбија, во Јужна Каролина, на стадионот „Williams-Brice“, на 29 октомври, како и во Индијанаполис, на стадионот „Lucas Oil“, на 31 октомври. Сите четири концерти беа дел од проширувањето на турнејата за осум настапи, објавено во август.
Организаторот на турнејата ја објасни одлуката во соопштението објавено од стадионот „Lucas Oil“. Во него се наведува дека по низата распродадени концерти на стадионите била донесена тешка одлука да се откажат дел од настапите со цел да се заштитат здравјето и благосостојбата на изведувачите и екипата.
Се додава дека обврските што ги носи турнеја со вакво времетраење и обем се значителни и дека овие измени ќе овозможат преостанатите настапи да продолжат на безбеден и одржлив начин.
Организаторот не наведе дека откажувањата се поврзани со судската постапка против Браун. Браун во јули пред Крунскиот суд во Саутворк, Лондон, ја призна вината за тепачката во врска со нападот во ноќниот клуб „Tape“ во 2023 година.
Британското обвинителство тогаш соопшти дека Браун ѝ се приближил на жртвата на подиумот за танцување и двапати ја удрил по главата со стаклено шише. За истото дело вината ја призна и неговиот вокален тренер Омололу Акинлолу. Судијата Тони Баумгартнер за двајцата го закажа изрекувањето на пресудата за 26 октомври и го остави Браун на слобода со кауција.
Според условите на кауцијата, Браун смее да го напушти Обединетото Кралство, но мора да се врати најдоцна до 25 октомври. Како што објави „AP“, за ова дело е предвидена казна затвор до три години.
Сепак, турнејата не е целосно откажана. Ашер и Браун сè уште се најавени за концертот на 15 октомври на стадионот „MetLife“ во Њу Џерси. По него, следниот настап е на 5 ноември во Атланта, каде што до 11 ноември се планирани пет концерти на стадионот „Mercedes-Benz“.
Не се објавени заменски датуми за четирите града во кои концертите беа откажани, а „Ticketmaster“ наведе дека купувачите на билети ќе ги добијат парите назад во следните три недели.
