Феликс Савон (59), еден од најуспешните боксери во историјата на Куба и трикратен олимписки шампион, повторно се најде во центарот на вниманието откако на социјалните мрежи се прошири снимка на која пребарува контејнер за отпад во потрага по храна.
Видеото го објави кубанскиот професионален боксер Густаво Трухиљо, а на него се слуша како маж од автомобил го прашува Савон што прави.
„Собирам храна, барам нешто за јадење“, одговорил легендарниот боксер.
Времето и точната локација на кои е направена снимката не се потврдени. Исто така, нема веродостојни податоци за неговата моментална финансиска состојба, па околностите под кои настанало видеото остануваат непознати.
FÉLIX SAVÓN: RECOGE COMIDA
DE LA BASURA
Hay imágenes que duelen y retratan el fracaso del sistema, uno de los boxeadores más grandes de todos los tiempos. Tres veces campeón olímpico, seis veces campeón mundial: las medallas no alimentan a nadie cuando se apagan las cámaras. https://t.co/RwWjubRnIl
— trotamundo (@BrandoBanyard) October 12, 2026
Трикратен олимписки шампион и легенда на кубанскиот бокс
Савон е роден на 22 септември 1967 година во провинцијата Гвантанамо, а најголемите успеси ги постигнал во тешката категорија до 91 килограм.
Олимпиското злато го освојувал на три последователни Олимписки игри – во Барселона во 1992 година, во Атланта во 1996 година и во Сиднеј во 2000 година. Со тоа им се придружил на својот сонародник Теофило Стивенсон и на Унгарецот Ласло Пап, единствените двајца боксери кои пред него го постигнале истиот успех.
Во текот на кариерата освоил и шест светски титули, во периодот од 1986 до 1997 година, како и три златни медали на Панамериканските игри.
Иако добивал понуди да премине во професионалниот бокс, Савон останал аматер. Во интервју за ЕСПН во 2015 година, тој тврдел дека одбил понуди вредни милиони долари за борби со Мајк Тајсон и Ивандер Холифилд, наведувајќи дека тоа го направил од лојалност кон Куба.
„Бев воз, бев машина за удирање. Мислам дека Тајсон немаше да може да издржи со мене“, изјавил тогаш Савон.
Кариерата му ја засенија сериозни обвинувања и затворска казна
Години по завршувањето на спортската кариера, името на Савон беше поврзано со сериозни обвиненија за сексуална злоупотреба на малолетници.
Кубанскиот независен новинар Абрахам Хименес Еноа во 2018 година пишувал дека поранешниот боксер завршил во затвор по пријава од семејството на дванаесетгодишно момче. Подоцна, некои медиуми објавија содржина од наводно затворско досие, според кое Савон бил осуден на 11 години затвор за сексуални престапи врз малолетници. Во истиот документ се споменува и дополнителна тригодишна казна поради сообраќајна несреќа во која биле повредени три лица.
Сепак, автентичноста на објавениот документ не е независно потврдена, а кубанските власти јавно не ја објавиле пресудата. Поради тоа, деталите од овие извештаи треба да се земат со резерва.
Според пишувањето на независниот портал „КубаНет“ (CubaNet), Савон бил условно ослободен на крајот на 2024 година, по приближно шест години поминати во затвор.
Неговото ослободување предизвикало реакции кај организациите за заштита на децата и правата на жените, кои побарале објаснување за околностите под кои била донесена таквата одлука. Причините за условното ослободување не се јавно разјаснети.
