Типичните симптоми на алергија на полен, грини, мувла и животински влакна вклучуваат кивање, чешање на носот, обилно течење бистар секрет, отекување на слузницата и отежнато дишење низ носот. Понекогаш се јавува и ослабено сетило за мирис, пишува „Miss7“.

Меѓутоа, многу од овие симптоми се карактеристични и за настинката, па се поставува прашањето како да се препознае за што станува збор.

Алергијата настанува кога имунолошкиот систем претерано реагира на супстанции од околината кои инаку не се опасни за повеќето луѓе. Меѓу најчестите алергиски заболувања се алергискиот ринитис и алергискиот риноконјунктивитис, кој ги зафаќа носот и очите. Од друга страна, настинката е акутна вирусна инфекција на горните дишни патишта. Најчесто ја придружуваат течење и затнатост на носот, кивање, блага болка во грлото, а понекогаш и покачена температура и болки во мускулите.

Настинката обично поминува за неколку дена, додека симптомите на алергија можат да траат со недели, па дури и со месеци.

Седум знаци кои можат да помогнат да ја разликувате алергијата од настинката

Иако симптомите често се преклопуваат, постојат одредени разлики на кои треба да се обрне внимание.

1. Покачена температура

Ако покрај затнатиот нос, кивањето и болката во грлото се јави покачена температура, поверојатно е дека станува збор за вирусна инфекција отколку за алергија. Кашлица може да се јави кај двете состојби, па сама по себе не е сигурен показател.

2. Траење на симптомите

Настинката најчесто поминува за седум до десет дена, додека алергиските тегоби можат да траат значително подолго, особено ако лицето постојано е изложено на алергенот.

3. Повторување во ист период од годината

Ако кивањето, течењето на носот и чешањето на очите се јавуваат секоја година во приближно исто време, можно е причината да е сезонска алергија.

4. Чешање на носот и очите

Чешањето на очите, носот и непцето е карактеристично за алергиските реакции. Кај обичната настинка овие симптоми се значително поретки.

5. Зачестено кивање

Кај алергијата кивањето често се јавува во напади, односно повеќепати едноподруго. Може да донесе краткотрајно олеснување, но симптомите обично се враќаат додека трае изложеноста на алергенот.

6. Реакција на лекови против алергија

Ако симптомите значително се ублажат по земањето соодветни антихистаминици, тоа може да укажува на алергија. Сепак, реакцијата на лекот сама по себе не е доволна за поставување дијагноза.

7. Придружни тегоби

Алергискиот ринитис може да биде придружен со воспаление на слузницата на параназалните синуси, а кај децата понекогаш се поврзува и со зачестени проблеми со ушите. Меѓутоа, слични компликации можат да се јават и кај респираторните инфекции.

Сезонската алергија зависи од концентрацијата на полен

Кај повремениот алергиски ринитис симптомите се јавуваат најмногу четири дена неделно или траат пократко од четири недели.

Сезонските алергии најчесто ги предизвикува поленот од дрвјата, тревите и плевелите, а интензитетот на тегобите зависи од концентрацијата на полен во воздухот.

Симптомите обично се поизразени во периодите на интензивно цветање, особено наутро, како и во сончевите и ветровити денови.

Наспроти тоа, за време на дождливо време и во вечерните часови концентрацијата на полен често е пониска.

Во нашите краишта сезоната на полен од дрвјата почнува кон крајот на зимата и почетокот на пролетта, додека тревите најчесто цветаат од мај до јули.

Поленот од плевелите, особено од амброзијата, може да предизвикува тегоби од крајот на летото до есента, најчесто во август и септември, а понекогаш и во октомври.

Алергијата може да трае во текот на целата година

За разлика од сезонскиот, трајниот алергиски ринитис се карактеризира со симптоми кои се јавуваат повеќе од четири дена неделно и траат подолго од четири недели.

Тегобите можат да бидат присутни во текот на целата година, а нивниот интензитет варира.

Најчести причинители се грините од домашната прашина, додека алергиски реакции можат да предизвикаат и мувлата и алергените од домашните миленици.

Кај лицата кои се чувствителни и на сезонски и на целогодишни алергени, симптомите можат да бидат постојано присутни, со повремени влошувања во сезоната на цветање.

Доколку тегобите траат долго, често се повторуваат или ги попречуваат секојдневните активности, се препорачува лекарски преглед, со кој може да се утврди дали станува збор за алергија или за друг здравствен проблем.