Многу други спортисти одамна се во пензија, а Новак Ѓоковиќ на 40 години им одолева на сите предизвици. Често му е поставувано прашањето „Како?“, а знаеме по некој дел од одговорот.
Веќе не е необично да прочитаме дека победил тенисер кој е 15, 16, па дури и 19 години помлад од него, а во таква ситуација се довел работејќи на долговечноста.
Воведувал бројни иновативни методи, од кои некои се крајно екстремни. Така, во када со лед разговарал со Кевин Харт, а тоа многумина ги потсетило на познатата метода на Вим Хоф.
Овој човек стана планетарно популарен по книгата во која детално ги објасни придобивките од престојот во ледена вода. Тој ги обединува техниките на дишење, менталниот тренинг, но и привременото изложување на екстремни температури.
Овој концепт го развил Холанѓанецот познат под прекарот „Ледениот човек“, кој со години е еден од најпознатите застапници на изложувањето на екстремен студ.
Сепак, ледените купки претставуваат само еден дел од неговата метода. Важна улога имаат контролираното дишење, концентрацијата и менталниот тренинг. Техниката подразбира серии длабоки вдишувања проследени со задржување на здивот, додека телото постепено се навикнува на студот – од студени тушеви до потопување во ледена вода.
Поентата не е само телото да издржи екстремно ниски температури, туку свесно да се изложи на непријатност и да научи да ја контролира реакцијата на стрес.
Токму тој дел од методата му е важен и на Новак Ѓоковиќ, кој на овој начин работи на контролирање на реакциите во ситуации врз кои не може да влијае. На тенискиот терен тоа можат да бидат ветерот, однесувањето на публиката или други надворешни фактори кои можат да му ја нарушат концентрацијата.
Ѓоковиќ во февруари 2020 година објави снимка на која влегува во ледена планинска река во Италија. Успеал во неа да издржи една минута и 45 секунди.
„Ги користам методите на Вим и сметам дека се корисни за мојот живот воопшто. Силата на умот е сè“, изјави тогаш Ѓоковиќ.
Значи, не станува збор толку за физичка, колку за ментална подготовка.
Ова е само една од многуте методи што ги користи, а кои на обичен човек не би му паднале ниту напамет. Покрај тоа, тука се и хипербаричните комори, криотерапијата, терапијата со црвено светло, па дури и електромагнетната терапија.
Токму таа подготвеност да ги иновира работите во подготовката и закрепнувањето овозможи и денес да постои жива надеж дека може да ја освои 25-та грендслем-титула. Следниот турнир Србинот го игра во Пекинг од 30 септември.
