Инцидентот се случил во четвртиот гем од вториот сет, додека Осака сервирала при резултат 40:40. Наместо да продолжи со играта, таа морала да почека бидејќи зад судиското столче неколку луѓе се движеле низ ложата и позирале за фотографии. На снимките што се појавија на социјалните мрежи се гледа дека користеле и дополнително осветлување за фотографирањето.

„Ве молам, вие во ложата зад мене. Ви благодарам. Ве молам, седнете“, им се обратил Нуни.

Фотографирањето продолжило и за време на мечот

На друга снимка, која ја направил еден од гледачите, се гледа уште една група како позира, додека лице кое изгледа како член на персоналот на стадионот држи преносливо светло за да им помогне при фотографирањето.

Дури откако завршило фотографирањето, Осака повторно можела да се концентрира на сервисот. Сепак, прекинот очигледно не ѝ помогнал – имала проблеми со исфрлањето на топчето, ѝ се извинила на Захарова, а потоа го загубила поенот.

Јапонската тенисерка сепак го добила мечот. Двократната освојувачка на Ју-Ес Опен победила со 7:6 (6), 7:6 (3) против 101. тенисерка во светот.

Се огласија од Ју-Ес Опен

Откако снимките се проширија на социјалните мрежи, инцидентот го коментирал и Брендан Мекинтајр, раководителот за комуникации на Ју-Ес Опен.

„Сакаме нашите навивачи и гости одлично да си поминат кога ќе дојдат на Ју-Ес Опен, но истовремено мора да внимаваме тоа да не ги попречува играта и натпреварувањето на теренот“, изјавил тој.

Тој додал дека ваквите ситуации не се чести и дека главните судии можат да реагираат и да ѝ се обратат на публиката, исто како што прават кога бучавата од трибините станува прегласна.

На Ју-Ес Опен важат нешто поопуштени правила

Тениската публика традиционално мирува и не создава бучава додека трае поенот, а гледачите на многу турнири чекаат промена на страните за да влезат на трибините или да ги напуштат. Сепак, Ју-Ес Опен во последните години има нешто поинаков пристап.

Турнирот во 2024 година вовел политика на послободно движење на гледачите за време на мечевите. Со тоа атмосферата на трибините стана поопуштена отколку на некои други гренслем-турнири, но од публиката и понатаму се очекува со своето однесување да не ги попречува тенисерите.

Особено бучно знае да биде на најголемите стадиони, „Артур Еш“ и „Луис Армстронг“, и тоа за време на вечерните мечеви. „Телеграф“ пишува дека дел од посетителите доаѓаат на турнирот и поради дружењето и забавата, а не исклучиво поради тенисот. Како што наведуваат, стадионот „Луис Армстронг“ во одредени моменти повеќе потсетува на место за дружење и храна со тениски терен во средината.

Таквата атмосфера не им одговара секогаш на тенисерите. Британецот Џејкоб Фернли минатата година за време на еден меч дури го прашал судијата дали на стадионот навистина треба да биде „толку гласно“.

Најновиот инцидент повторно ја отвори дебатата за границата меѓу поопуштената атмосфера по која е познат Ју-Ес Опен и основното почитување кон тенисерите на теренот.