Јасно е дека во текот на жешките денови треба да се води сметка за правилната хидратација. Сепак, освен водата, вреди да посегнете и по уште еден напиток што го препорачуваат нутриционистите и кој одлично ја гаси жедта. Станува збор за кефир. Зошто е добар избор кога надвор е спарно и жешко?

Кефир – идеален избор во текот на горештините

Високите температури најмногу влијаат врз децата, постарите лица и хронично болните. Особено опасни се дехидратацијата и прегревањето, кои може да се манифестираат со главоболка, дијареја, мачнина, дезориентација и изразен замор. Поради тоа, правилната хидратација е многу важна, па во текот на жешките денови секогаш треба да имате шише вода при рака.

Сепак, вреди да се пие и кефир. Тоа е ферментиран млечен напиток што се добива со додавање кефирни зрна. На организмот му обезбедува драгоцени електролити, како калциум, натриум и калиум, кои помагаат во гаснењето на жедта.

Кефирот може да придонесе и за повисоко ниво на енергија бидејќи содржи низа хранливи материи, меѓу кои се магнезиум, витамин Ц, витамин Б12, железо, манган и цинк. Во 100 грама кефир има околу 50 калории, па на организмот му дава повеќе енергија од напитoците како водата или чајот.

Кефирот не помага само против жедта

Кефирот не само што ја гаси жедта и дава енергија, туку има и други корисни својства благодарение на хранливите состојки што ги содржи. Пред сè, богат е со пробиотски култури кои директно влијаат врз цревната микрофлора, со што го поддржуваат функционирањето на системот за варење и имунолошкиот систем.

Содржи и бактерии од родот Lactobacillus, кои може да помогнат во заштитата на организмот од штетни бактерии, како салмонела и ешерихија коли.

Кефирот нема многу калории, поради што често им се препорачува на лицата кои сакаат да го намалат вишокот килограми, но и на спортистите. Освен тоа, придонесува за зачувување на здравјето на коските, што е особено важно за постарите лица кај кои е зголемен ризикот од остеопороза.

Се наведува и дека може да придонесе за спречување на таложењето холестерол на ѕидовите на артериите и така да помогне во заштитата од атеросклероза. Кефирот може да се пие и навечер, а се смета дека тогаш може да го поддржи метаболизмот.

Дали кефирот е за секого?

Кефирот содржи лактоза, па лицата кои се алергични на протеините од кравјото млеко треба да го избегнуваат. Во продавниците, сепак, може да се најдат и варијанти без лактоза.

Кефирот не е секогаш добар избор ниту при проблеми со системот за варење, бидејќи може да ги влоши тегобите, особено болките во стомакот и дијарејата.

Што друго да пиете и јадете во текот на жешките денови?

Во текот на горештините, освен вода и кефир, се препорачуваат и намирници богати со вода. Меѓу нив е лубеницата, која се состои од приближно 93 отсто вода, а истовремено содржи бројни корисни хранливи материи.

Од овошјето добар избор се и дињите, додека меѓу зеленчукот предничат краставиците и доматите.

Во текот на летото подобро избегнувајте тешки и многу солени оброци, бидејќи по нив чувството на жед може да биде уште поизразено.