Аргентина би можела да се соочи со дисциплинска мерка од ФИФА откако нејзините играчи ја прославија победата над Англија во полуфиналето на Светското првенство со транспарент со политичка порака за Фолкландските Острови.

Актуелниот светски шампион направи спектакуларен пресврт во Атланта и ја победи Англија со 2:1 со головите на Енко Фернандез и Лаутаро Мартинез во финишот, со што го доби финалето против Шпанија.

Сепак, веднаш по натпреварот, аргентинската репрезентација крена транспарент со натпис „Las Malvinas son Argentinas“ („Малвинските Острови се аргентински“), со што повторно се отвори едно од најчувствителните политички прашања меѓу Аргентина и Велика Британија.

ФИФА веќе ја казни Аргентина за истата порака

Фолкландските Острови, британска прекуокеанска територија во Јужниот Атлантик, се предмет на спор меѓу двете земји со децении.

Конфликтот кулминираше во 1982 година, кога Аргентина и Велика Британија водеа 74-дневна војна за контрола врз островите.

Во војната загинаа 655 аргентински и 255 британски војници, како и тројца жители на островот.

Ова не е првпат Аргентина да се соочи со можни санкции за истата порака.

Во 2014 година, ФИФА ја казни Фудбалската асоцијација на Аргентина со 20.000 фунти, откако репрезентативците развиорија идентичен транспарент пред пријателскиот натпревар со Словенија.

Во тоа време, светската управна организација на фудбалот оцени дека е прекршено правилото што забранува политички пораки и несоодветно однесување на националните тимови.

Потпретседателот на Аргентина дополнително ги зголеми тензиите

По победата над Англија, потпретседателката на Аргентина, Викторија Виљареал, на социјалната мрежа „X“ објави видео за кое се верува дека прикажува аргентински војници, со пораката:

„Ова не беше само уште еден натпревар“.

Потоа додаде: „Малвинските Острови се аргентински. Ни забранија да ги внесуваме на стадионот, но заборавија дека ги носиме во крвта и срцето“.

Уште пред полуфиналето, Виљарел изјави дека дуелот со Англија е можност да се „стават освојувачите на нивно место“, што предизвика дополнителни реакции.

„Фудбалот и политиката не смеат да се мешаат“

За разлика од политичките пораки што следеа по натпреварот, селекторот на Аргентина, Лионел Скалони, се обиде да ги смири тензиите пред натпреварот.

„Ова е фудбалски натпревар. Не сакам да мешам спорт и политика, од почит кон сè што се случи пред многу години.“

Поради историските тензии меѓу двете земји, организаторите воведоа зголемени безбедносни мерки за полуфиналниот дуел меѓу Англија и Аргентина во Атланта.

Сепак, прославата на аргентинските фудбалери со транспарент може да предизвика нова реакција од ФИФА, која јасно стави до знаење дека не дозволува политички пораки на теренот на своите натпреварувања.