„BMW“ неодамна ја претстави целосно новата, петта генерација на моделот „X5“, а неговиот дизајн веќе навестува како би можел да изгледа и следниот „BMW X6“.
Познатиот дигитален дизајнер Теофилус Чин, попознат под прекарот „Theottle“, брзо ја искористи можноста и објави рендер-фотографии што го прикажуваат потенцијалниот изглед на идниот „X6“, заснован на дизајнерската филозофија „Neue Klasse“ на „BMW“.
Додека „BMW X5“ е присутен на пазарот уште од 1999 година, „X6“ се појави дури во 2008 година како еден од пионерите во сегментот на купе-SUV модели.
Актуелната генерација беше претставена во 2019 година, а редизајнот пристигна на почетокот на 2023 година, поради што моделот постепено се приближува кон крајот на својот животен циклус. Иако „BMW“ засега не ги открива своите планови, новиот „X6“, доколку добие зелено светло за производство, би можел да пристигне веќе во текот на 2027 година.
Рендерите покажуваат дека идниот „X6“ би можел да го преземе предниот дел од новиот „X5“, но со уште поспортски пропорции.
Традиционално, „X5“ и „X6“ делат голем дел од каросеријата сè до Б-столбот, по што „X6“ продолжува со свој препознатлив изглед благодарение на купе-линијата на покривот, која постепено се спушта кон задниот дел на возилото.
Кога станува збор за задниот дел, инспирацијата делумно е преземена од моделот „X2“. Сепак, дизајнерот вградил помодерни LED светлосни групи, за изгледот да биде посовремен и поблизок до идните модели на „BMW“.
Се очекува сериската верзија да добие подолги и поелегантни светла, слични на оние што веќе ги гледаме кај моделите „i3“, „iX3“ и новиот „X5“.
Внатрешноста и механичката платформа најверојатно ќе бидат преземени од „X5“. Тоа значи дека новиот „X6“ би можел да биде достапен со благ хибриден, plug-in хибриден и целосно електричен погон.
Во понудата, најверојатно, ќе остане и моќната V8 верзија со два турбополначи, наменета за спортските изведби.
Одредени извори ја споменуваат и можноста за воведување водороден погон, развиен во соработка со „Toyota“, иако „BMW“ би можел ваквата технологија да ја резервира исклучиво за моделот „X5“.
„BMW“ веќе потврди дека помалиот „X4“ нема да добие наследник поради променетите пазарни услови, додека неговата улога делумно ја презеде „X2“.
Судбината на „X6“ засега останува неизвесна, бидејќи сè уште не се забележани тест-прототипови на јавните патишта. До тогаш, рендерите на „Theottle“ претставуваат најдобар увид во тоа што Минхен би можел да подготвува за следната генерација на својот купе-SUV модел.
