Познат колекционер на хиперавтомобили јавно ја објави е-поштата со која „Ferrari“ се обидел да го заинтересира за купување на моделот „Luce“, а неговиот одговор набрзо стана вирален.

Како што пренесува „The SupercarBlog“, продажниот советник на „Ferrari“, Ли Перкинс, го контактирал колекционерот Џефри Ченг, на „Instagram“ попознат како@speedy_jeff, со цел да му го претстави првиот електричен „Ferrari“.

Во пораката, „Luce“ е опишан како визија на „Ferrari“ за иднината, со нагласок дека и покрај електричниот погон, ќе го задржи возачкото искуство верно на ДНК-то на брендот. Перкинс објаснил дека компанијата контактира избрана група сопственици и љубители на електрични автомобили за да ги запознае со можноста за резервација на возилото и постапката за нарачка.

„Мора да се шегувате“

Одговорот на Ченг бил исклучително остар.

„Се надевам дека се шегувате“, напишал тој на почетокот од одговорот, додавајќи дека „не би го фатиле мртов“ во тој автомобил.

Тој истакнал и дека му е „речиси непријатно“ поради продажните советници на „Ferrari“ кои мораат да продаваат таков автомобил, а „Luce“ го нарекол „изрод“.

„Не е достоен ниту за логото на „Hyundai““

Колекционерот нагласува дека неговиот проблем не е само електричниот погон, туку пред сè дизајнот, за кој смета дека нема никаква врска со традицијата на „Ferrari“.

„Luce не е достоен ниту за логото на „Hyundai“, ниту за она на „Kia“, а камоли за знакот на „Ferrari“, напишал тој.

„Ова е апсолутна шега на толку многу нивоа што не можам да сфатам како група Италијанци, веројатно меѓу најдобрите автомобилски дизајнери во светот, можела да одобри нешто што изгледа целосно неиталијански.“

Ченг смета дека секој што сака врвен електричен автомобил денес може да избере модели од брендовите „Tesla“, „Rivian“ или „Lucid“, а дека „Ferrari Luce“ најмногу ќе го купуваат оние кои сакаат да ја подобрат својата позиција во познатиот систем на „Ferrari“ за доделување ексклузивни модели, со што би ги зголемиле шансите во иднина да купат некој лимитиран модел на италијанскиот производител.

На крајот, тој му порачал на продажниот советник дека неговиот одговор слободно може да го проследи до управата на „Ferrari“.