Во „Petersen Automotive Museum“ во Лос Анџелес е отворена необична изложба, на која класични автомобили се обоени така што изгледаат како дводимензионални цртежи.

Автор на изложбата е уметникот Џошуа Видес, а неговата инсталација наречена „Flat Out“ ќе биде отворена до јули 2027 година. Фотографиите веќе привлекуваат огромно внимание на социјалните мрежи, но посетителите кои ја виделе изложбата во живо велат дека впечатокот е уште поимпресивен.

Автомобили како од стрип

На изложбата се претставени класични модели на „Mercedes“, „Porsche“ и „Ferrari“, кои најпрво биле обоени во бела боја, а потоа рачно исцртани со прецизни црни линии за да изгледаат како скици од стрип.

Но, не се обработени само автомобилите. Целата гаража во која се изложени е уредена во истиот стил, па посетителите имаат чувство како да зачекориле во дводимензионален свет.

Секој детаљ на автомобилите поминал низ истиот процес – од браниците, светлата и маските на ладилникот, па сè до отворите за воздух. Посебно се издвојува „Ferrari 308 GTS“, чија каросерија е прекриена со течни црни линии што дополнително го засилуваат впечатокот дека не станува збор за вистински автомобил.

Иако ваквиот начин на боење не би бил практичен за секојдневно возење, како музејски експонат остава исклучително силен визуелен впечаток.

„Остварување на сон“

„Претходно имав можност да осликувам многу автомобили и да организирам изложби, но реализацијата на концептот „Reality to Idea“ во галеријата на музејот „Petersen“ е остварување на мојот сон“, изјави Џошуа Видес во разговор за „Hemmings“.

„Секој автомобил претставува уникатно платно, исто како и просторот во кој е поставен. Голема чест ми е што оваа изложба можев да ја реализирам токму во „Petersen“ и со нетрпение очекувам посетителите да ја доживеат“, додаде тој.

Работел за „BMW“, „Formula 1“ и „Fendi“

Џошуа Видес досега соработувал со бројни познати брендови и организации, меѓу кои се „NBA“, „Formula 1“, „BMW“ и „Fendi“.

Својот препознатлив уметнички стил го нарекува „Reality to Idea“, односно враќање на готовите производи во изгледот на нивните првични дизајнерски скици.

Изложбата опфаќа пет автомобили и специјално уредена гаража, а нејзината посета е вклучена во стандардниот билет за „Petersen Automotive Museum“.