Селекторот на фудбалската репрезентација на Португалија, Роберто Мартинез, не сакаше да открие дали Кристијано Роналдо ќе биде стартер на натпреварот против Узбекистан на Светското првенство.
Ова е една од главните теми по бледото издание на Роналдо на првиот натпревар од турнирот.
„Не можам да ве информирам за стартниот состав, бидејќи сè уште не сум ги известил моите играчи“, изјави Мартинез, запрашан дали Роналдо ќе остане во почетниот тим.
Роналдо не успеа да постигне гол во ремито на Португалија против Демократска Република Конго (1:1), во натпреварот од првото коло од групата К на Светското првенство.
Телевизиските аналитичари и корисниците на социјалните мрежи го критикуваа Роналдо откако пропушти неколку одлични шанси за гол во второто полувреме. Дел од нив се прашуваа зошто Мартинез не го замени во вториот дел од натпреварот, кога тимот имаше проблеми во нападот.
Мартинез порача дека критиките не влијаат врз неговиот тим и додаде дека таквите приказни се составен дел од настапите на големи натпреварувања како што е Светското првенство.
„Играме на Светско првенство, па нормално е да има многу врева и тензии, но тоа е дел од играта. Нашиот фокус е на тимот и сакаме да покажеме позитивен став … да бидеме подготвени за натпреварот. Многу сме концентрирани. Силни сме. Тимот е уште пообединет отколку претходно“, изјави селекторот на Португалија.
Иако не се осврна директно на Роналдо, Мартинез додаде дека дел од критиките се „неправедни“.
Роналдо не разговараше со новинарите по натпреварот, но двапати се огласи на социјалните мрежи по ремито.
Во првата објава напиша:
„Ова не беше почетокот што го посакувавме, но ова е далеку од крајот. Главата горе и фокус на следниот натпревар.“
Во неделата објави четири фотографии од тренингот на репрезентацијата и напиша:
„Фокусиран на мисијата.“
Роналдо и Аргентинецот Лионел Меси станаа единствените фудбалери кои настапиле на шест Светски првенства, благодарение на нивното учество на овогодинешниот турнир.
Португалецот против Узбекистан повторно ќе се обиде да стане првиот играч во историјата кој постигнал гол на шест различни мундијали, откако не успеа да го направи тоа на првиот натпревар.
Во моментов тој го дели овој рекорд со Меси, кој оваа година постигна пет гола на два натпревари за Аргентина и стигна до рекордни 18 погодоци на пет светски шампионати. Сепак, Меси не успеа да се запише меѓу стрелците на Светското првенство во 2010 година.
Селекторот на Узбекистан, Фабио Канаваро, знае дека не смее да го потцени Роналдо, без оглед на настапот на Португалија во првиот натпревар.
„Мора да бидеме внимателни во шеснаесетникот, бидејќи не смееме да оставиме ваков играч сам. Треба да бидеме максимално фокусирани на него, затоа што Кристијано може да постигне гол во секоја ситуација – од слободен удар, па дури и по корнер. Затоа мора да бидеме исклучително претпазливи“, изјави Канаваро.
Натпреварот од второто коло во групата К меѓу Португалија и Узбекистан се игра денес од 19:00 часот во Хјустон.
По првото коло, Колумбија е прва на табелата во оваа група со три бода, Демократска Република Конго и Португалија имаат по еден бод, додека Узбекистан сè уште е без освоен бод.
