Во Грција избувнаа силни пожари на островите Сирос и Евија, поради што беа евакуирани населени места. Поради силниот ветер гаснењето е отежнато, а властите ги повикуваат жителите да ги следат предупредувањата.
Голем пожар избувна денеска на грчкиот остров Сирос, во областа Ампела, каде што огнот зафатил ниска вегетација и сува трева. Според грчката противпожарна служба, силните ветрови значително ја отежнуваат интервенцијата на пожарникарите и придонесуваат за брзо ширење на пламените јазици.
Во гаснењето на пожарот учествуваат десет пожарникари со три противпожарни возила, додека од воздух се ангажирани два авиона и три хеликоптери. Поддршка даваат и доброволци, како и цистерни обезбедени од локалните власти.
Наредена евакуација на населението
Поради опасноста од ширење на огнот кон населените места, грчките власти преку системот за итни предупредувања 112 издадоа наредба за евакуација на жителите од населбата Трија Лагонија. На населението му било препорачано веднаш да се упати кон Ермуполи, административниот центар на островот.
На местото на настанот се испратени и специјални истражни тимови кои треба да ги утврдат причините за избувнувањето на пожарот.
Под контрола пожарот на островот Евија
Во меѓувреме, грчките пожарникари успеаја да го стават под контрола големиот пожар што избувна вчера во областа Алмиропотамос, во регионот Каристос на островот Евија.
И покрај тоа што главниот фронт на пожарот е локализиран, противпожарните екипи остануваат на терен поради ризикот од повторно разгорување на огнот и појава на нови жаришта. Во операцијата учествуваат околу 120 пожарникари, пет специјализирани пешадиски единици, доброволци и 35 противпожарни возила.
Силните северни ветрови и на Евија го отежнувале гаснењето и придонеле за создавање нови жаришта. Поради опасноста, грчките власти наредиле евакуација на две населени места во близина на пожарот.
Надлежните служби остануваат во состојба на готовност, а жителите се предупредени да ги следат официјалните известувања и препораки.
Εύβοια: Φωτιά τώρα στην Κάρυστο pic.twitter.com/hcUrRTANom
— Flash.gr (@flashgrofficial) June 20, 2026
Грција повторно се соочува со сезоната на пожари
Грција, како и повеќето медитерански земји, секое лето се соочува со сериозни шумски пожари. Експертите предупредуваат дека климатските промени, високите температури и долгите сушни периоди придонесуваат пожарите да бидат сè почести, поинтензивни и потешки за контролирање.
Властите стравуваат дека најавените силни ветрови во наредните денови дополнително ќе го зголемат ризикот од нови пожари низ земјата.
