Боливија покажува знаци на нормализација по 50 дена протести и блокади

Во Боливија денеска се забележани првите знаци на враќање кон нормално функционирање по речиси 50 дена протести и блокади, откако властите и демонстрантите постигнаа повеќе договори за деблокада на клучните патни правци.

Еден ден по прогласувањето вонредна состојба од страна на претседателот Родриго Паз, боливиското Собрание со големо мнозинство усвои уредба со која се предвидува обновување на сообраќајот и снабдувањето со основни производи, по повеќенеделните блокади што предизвикаа недостиг од храна, гориво и лекови.

Во департманот Санта Круз локалните власти и претставниците на демонстрантите потпишаа договор за отстранување на блокадата во Сан Хулијан, додека една од најголемите земјоделски организации во Ла Паз најави привремено прекинување на протестите, иако нивните барања остануваат непроменети.

Полицијата и армијата и натаму се распоредени низ земјата, но националната управа за патишта соопшти дека повеќе нема активни блокади поврзани со протестите, иако на повеќе локации ќе бидат потребни поправки на оштетената инфраструктура.

Политичката и социјалната криза започна откако претседателот Паз, кој ја презеде функцијата во ноември, ги укина долгогодишните субвенции за гориво во обид да го намали буџетскиот дефицит во услови на недостиг од американски долари и преговори со Меѓународниот монетарен фонд.

Иако подоцна беа воведени мерки за стабилизирање на цените на горивата и делумно беа повлечени спорните реформи, протестите продолжија, а синдикатите побараа повисоки плати, решавање на недостигот од гориво и девизи, како и оставка од претседателот.

Смирувањето на тензиите се совпадна со одбележувањето на Андско-амазонската Нова година, при што државни претставници и лидери на домородните заедници упатија повици за единство и помирување.

Министерката за туризам Синтија Јанес изрази надеж дека во земјата повторно ќе се вратат „просперитетот“ и „изобилството“ и дека граѓаните повторно ќе бидат обединети.