По раното водство што го донесе Жоао Невеш со гол со глава, Јоан Виса го израмни резултатот пред крајот на првото полувреме. Резултатот на семафорот остана непроменет до крајот на натпреварот, а Португалија остана без однапред очекуваните бодови.

Бранот критики беше очекуван по ваквиот исход, а особено силни беа критиките упатени кон капитенот и најголемата легенда на Португалија – Кристијано Роналдо, кој не успеа да упати ниту еден удар кон голот.

Напад врз соиграч

Навивачите и аналитичарите беа бесни поради неговиот настап, бидејќи сметаат дека 41-годишен фудбалер со таков учинок нема што да бара на теренот. Атмосферата околу Роналдо и репрезентацијата веќе е многу мрачна, па затоа не помагаат ниту дополнителните проблеми што доаѓаат од страна.

Еден од тие проблеми се појави по натпреварот, ни помалку ни повеќе, туку од сестрата на Роналдо. Имено Катија Авеиро на Инстаграм ставила „лајк“ на објава во која се напаѓа соиграчот на Роналдо, Бруно Фернандеш.

Во објавата на една бразилска страница, капитенот на Манчестер Јунајтед се споредува со крилниот напаѓач на Барселона, Рафиња, кој оваа недела се најде на удар на критики поради слабите настапи за бразилската репрезентација. Тие двајца се споредуваат затоа што, во очите на навивачите играат фантастично за своите клубови, а многу слабо за репрезентацијата.

„Овој овде е португалската верзија на Рафиња. За репрезентацијата е само набљудувач со пуканки во рацете“, пишува покрај објавата.

Објавата брзо стана вирална, а со тоа се прошири и веста дека сестрата на капитенот на репрезентацијата поддржала напад врз неговиот соиграч.

Сомнеж во селекторот

На Роналдо не му оди во прилог ниту фактот што неговиот сегашен селектор Роберто Мартинез се поврзува со Ал Наср, клубот за кој настапува. Мартинез веќе десет години не работи во клупскиот фудбал, а сега, според „Дејли мејл“, е сè поблиску до тоа да му се придружи на Роналдо за богат договор во Саудиска Арабија.

Мартинез исто така е на удар на критики, бидејќи се смета дека не е способен да ја постави играта без Роналдо на теренот и дека не може да го извади од игра кога е потребно. Поради тоа, ваквиот трансфер само дополнително би ги зголемил големите сомнежи и нервозата околу репрезентацијата.

Португалија следниот натпревар го игра за пет дена против Узбекистан, со почеток од 19 часот.