Вкупно 48 репрезентации, 24 натпревари во 12 групи – сите еднаш излегоа на теренот.

Доволно „материјал“ за да се избере идеалниот тим на стартот од Светското првенство.

Редакцијата на португалскиот спортски весник „A Bola“ ги избра најдобрите 11 фудбалери од првото коло, а во тимот се најдоа некои од најголемите напаѓачки ѕвезди на денешниот фудбал: Лионел Меси, Ерлинг Халанд и Килијан Мбапе.

Ретко се памети Светско првенство на кое најголемите ѕвезди веднаш блеснале. Меси постигна три гола, Халанд и Мбапе по два, исто како и Хари Кејн, за кого овојпат едноставно немаше место во нападот.

Можеби ќе го има во второто коло, по групната фаза или, најважно, на крајот од Мундијалот.

До тогаш, статусот на „идеални“, барем според португалскиот весник, го уживаат и двајца фудбалери од егзотичната африканска репрезентација Зеленортски Острови, селекција која на стартот го запре актуелниот светски шампион Шпанија.

И токму тоа е Светското првенство – во најубавата смисла на зборот.

Еве ги најдобрите 11 фудбалери од досегашниот тек на Мундијалот според „A Bola“.

Возиња (Зеленортски Острови)

Бројот на неговите следбеници на Инстаграм за само еден ден пораснал од неколку илјади на дури 10 милиони.

По неговата партија против Шпанија, неговата мајка добила виза за влез во САД и ќе може да го следи на преостанатите два натпревари од групата.

Јошуа Кимих (Германија)

Германците имаа најлесна задача од сите фаворити, но тоа не ја намалува тежината на убедливата победа од 7:1 против Курасао.

Фудбалерот на Баерн од позицијата десен бек постојано беше вклучен во нападите, учествуваше во организацијата на играта и запиша две асистенции.

Динеј (Зеленортски Острови)

Една од „сините ајкули“ кои со своите тела го бранеа голот против Шпанците.

Фудбалерите на Зеленортските Острови го правеа тоа организирано и елегантно – со само еден направен фаул на целиот натпревар.

Динеј, кој настапува во Обединетите Арапски Емирати, беше прв меѓу еднаквите.

Вирџил ван Дајк (Холандија)

Организатор на одбраната, иницијатор на нападите, а воедно и стрелец.

Дефанзивецот на Ливерпул уште еднаш покажа колку е важен за „лалињата“ во натпреварот против Јапонија.

Постигна гол во ремито 2:2 во Далас. Ниту тој, ниту Холандија, но ниту Јапонија, не го кажале последниот збор на овој турнир.

Натаниел Браун (Германија)

Левиот бек на Ајнтрахт Франкфурт се етаблираше во составот на „елфот“, а на стартот од Мундијалот го привлече вниманието и на светската јавност.

Беше присутен во речиси секој напад, а на крајот се запиша и меѓу стрелците против Курасао.

Ајуб Буади (Мароко)

Осумнаесетгодишниот играч за врска на Лил и нова ѕвезда на мароканскиот фудбал.

Прикажа партија за учебници против Бразил – толку млад, а толку зрел.

Според „Transfermarkt“, веќе вреди 50 милиони евра.

Хванг Ин-бом (Јужна Кореја)

Поранешниот играч на Црвена Ѕвезда, а сега фудбалер на Фејенорд, се прослави со гол и асистенција во победата на Јужна Кореја над Чешка со 2:1.

Воедно постигна и еден од најубавите голови досега на Мундијалот.

Јасин Ајари (Шведска)

Бомбардерот на Брајтон постигна два феноменални гола против „својот“ Тунис – земјата од која потекнува неговиот татко.

Пред неколку години беше блиску да заигра за Тунижаните, а сега им ги урна соништата во дресот на селекцијата на „трите круни“.

Лионел Меси (Аргентина)

Што да се каже, што да се напише – кога сè веќе е кажано и напишано … 

Некои веќе го отпишаа, а тој во пресрет на својот 39. роденден го постигна првиот хет-трик на Светските првенства.

Се израмни со Мирослав Клосе и со 16 погодоци стана најдобар стрелец во историјата на Мундијалите.

Ерлинг Халанд (Норвешка)

Прво Светско првенство, прв натпревар на Мундијал и веднаш два гола против Ирак.

И двата ги постигна како вистински предатор во шеснаесетникот.

Килијан Мбапе (Франција)

Имаше послабо прво полувреме против Сенегал, исто како и целата репрезентација на Франција, но во продолжението целосно се разигра.

Со два феноменални погодоци уште еднаш потврди дека Светското првенство е неговата омилена сцена.