Во ретко, целосно искрено интервју манекенката Кара Делевињ проговорила за својата зависност, откривајќи детали за зависноста од дрога, кога започнала и кога сфатила дека има проблем.
Делевињ гостувала во поткастот „Call Her Daddy“ кај водителката Алекс Купер, каде што открила дека како тинејџерка продавала дрога пред да западне во зависност. Триесет и тригодишната манекенка признала дека еден од нејзините најголеми проблеми бил со кетаминот, откако почнала да експериментира со дрога на 14-годишна возраст.
„Бидејќи во тој момент немав пари, почнав да купувам дрога за да ја продавам и да ја консумирам. Кога купував дрога за продажба, сè правев сама. Не баш сè. Половина ја продавав, а остатокот го земав за себе. Значи, практично ја продавав дрогата бесплатно. Не бев некој голем дилер“, раскажала таа.
„Ми се допаѓаше како се чувствував поради дрогата. Ми се допаѓаше тоа што не морав да размислувам за мајка ми. Ми се допаѓаше што не морав да чувствувам притисок поради тоа што не бев добра на училиште, што не се чувствував доволно добра или што не се сакав себеси. Сето тоа исчезнуваше“, додала Делевињ.
Моментот кога нејзината употреба на дрога се засилила бил кога почнала секојдневно да консумира ЛСД и поради тоа имала застрашувачки халуцинации.
„Мислев дека татко ми е Бог, а мајка ми ѓавол и дека морам да ја убијам за да го спасам крајот на светот. Го изгубив разумот“, раскажала таа, додавајќи и дека нејзиното ментално здравје било во ужасна состојба, толку многу што доживеала нервен слом на 15-годишна возраст.
„Едноставно станав суицидална. Целиот мој свет се распадна и си помислив: ’Мислам дека сè што сум мислела во последните 15 години било погрешно.‘ Мозокот ми беше во целосен хаос. Физички се онесвестував затоа што сакав да избегам“, објаснила таа.
Истата година кога го прославила 30-от роденден, Делевињ сфатила дека е време да се отрезни. „Отидов директно на фестивалот Burning Man. Потоа тоа се случи и си помислив: ’Можам да се отрезнам.‘ Се случи една песна случајно да почне да свири додека бев сама во хотелска соба, а тоа беше песната што свиреше на погребот на мој пријател кој почина од предозирање. И во тој еден момент си помислив: ’Што правам? Зошто го правам ова?‘ И ја фрлив целата дрога во ВЦ-школката“, раскажала манекенката.
Својот живот го променила во 2022 година, откако се појавиле нејзини фотографии на кои изгледала разбушавено и нервозно на аеродромот Ван Најс. Во еден момент шетала наоколу само во чорапи и разговарала на телефон додека пушела.
Тогаш се пријавила на програма од 12 чекори, а денес е инспирација за многумина. „Ако можев јас, можете и вие“, рекла Делевињ во една прилика.
