Ендру Маунтбатен-Виндзор, некогашниот принц Ендру и поранешен војвода од Јорк, повторно се најде под лупата на јавноста откако беше фотографиран со голема модринка на десната страна од лицето.

Фотографиите се направени во близина на неговиот нов дом на кралскиот имот Сандрингам, каде што се преселил по заминувањето од Кралската ложа. На нив се гледа како седи во автомобил, додека на неговото лице јасно се забележува голема модринка. Според извори на кои се повикуваат британските медиуми, повредата наводно не е причина за загриженост и се поврзува со безопасна медицинска состојба, но деталите не се јавно соопштени.

Ретко појавување

Ендру во последните месеци многу ретко се појавува во јавноста. Од почетокот на годината живее повлечено на имотот Сандрингам, откако ја напушти Кралската ложа, својот долгогодишен дом во Виндзор. Британските медиуми претходно пишуваа дека во новиот дом се преселил далеку од очите на јавноста, додека кралското семејство сè повеќе се дистанцира од него.

Неговото појавување со модринка доаѓа во момент кога интересот за него повторно е зголемен поради истрагата што се води во врска со неговите некогашни јавни функции и врските со Џефри Епстин.

Истрагата се проширува

Британската полиција ги истражува наводите за можна злоупотреба на јавна функција од периодот кога Ендру бил трговски пратеник на Обединетото Кралство. Според наводите на странските медиуми, истрагата ги опфаќа и тврдењата дека доверливи информации наводно споделувал со Џефри Епстин, покојниот финансиер и осуден сексуален престапник. Ендру претходно повеќепати негираше какво било незаконско постапување.

Полицијата на Темската Долина потврди и дека ги разгледува наводите што се однесуваат на жена за која се тврди дека во 2010 година била одведена на адреса во Виндзор „за сексуални цели“. Од полицијата порачаа дека, доколку жената сака да поднесе пријава, случајот ќе биде третиран сериозно и со заштита на нејзината приватност.