Некогашната фабрика на „Saab“ во Шведска ги распродава последните прототипи и развојни автомобили.
Повеќе од една деценија откако шведскиот производител на автомобили „Saab“ пропадна, мала колекција развојни возила и прототипи оди на аукција.
Аукцијата вклучува осум возила сместени во поранешниот погон на „Saab“ во Тролхатан. Поголемиот дел се базирани на моделот Saab 9-3 и се развивани по банкротот на „Saab“, односно на компанијата „NEVS“, основана во 2012 година по колапсот на шведскиот автомобилски производител.
„NEVS“, кратенка од „National Electric Vehicle Sweden“, се обиде да ја рестартира компанијата базирана на електрична и автономна технологија, но законски ѝ беше забрането користење на името „Saab“.
Со поддршка од кинескиот гигант за недвижности „Evergrande Group“, „NEVS“ со години развиваше електрични возила, автономни системи и експериментални погонски склопови, пред финансискиот колапс на компанијата практично да го запре работењето, а фабриката оттогаш постепено да се празни.
Сега се продаваат последните автомобили.
Меѓу поинтересните возила на аукцијата се наоѓа автономно развојно возило и уште еден прототип опремен со електромотори во тркалата, технологија која инженерите на „Saab“ некогаш ја истражувале како дел од идните програми за електрични возила.
Како што е познато, денес тоа е една од најинтересните технологии.
Тука е и хибриден тест-автомобил со продолжувач на досегот, денес исто така популарен концепт, како и неколку претпродукциски лимузини 9-3 произведени за време на ерата на „NEVS“.
Важно е да се напомене дека поголемиот дел од автомобилите не се исполирани музејски експонати.
Тоа се инженерски прототипи и работни тест-возила кои ги создавале инженери што продолжиле да ги развиваат идеите на „Saab“ долго по исчезнувањето на оригиналната компанија.
Аукциите ќе се одржат од 21 до 30 мај преку шведската аукциска куќа „Klaravik“, без објавени почетни цени за кој било автомобил.
Список на автомобили кои се продаваат:
• Претпродукциско возило Saab 9-3 Aero – моделска година 2014 со само 18.430 изминати километри. Гориво: бензин
• Претпродукциско возило Saab 9-3 Aero – моделска година 2014 со 38.780 километри. Гориво: бензин
• Претпродукциско возило Saab 9-3 – моделска година 2014 со 58.640 изминати километри. Гориво: бензин
• „NEVS 9-3“ електрично возило – претпродукциско возило (2018) на кинескиот „NEVS Electric 9-3“. Како и моделите Saab 9-3, се користело за интерен превоз. Километража: 38.000 километри
• „NEVS 9-3“ електричен прототип на претпродукциско возило – прототип со погон на сите четири тркала (2018) и четири мотори во тркалата, користен за развој на технологија на мотори во тркалата, оптимизација на шасијата и нагодување на системот за сопирање. Километражата е непозната
• „NEVS 9-3“ електричен прототип (автономен) – прототип (2018) опремен со системи за снимање и мерење како „GPS“, лидар и камери, користен за развој на софтвер за автономно возење. Километражата е непозната
• „NEVS 9-3“ електричен прототип („Range Extender“) – прототип (2014) опремен со бензински продолжувач на досегот. Километражата е непозната
• Електричен прототип „Hengchi 5“ – единствен примерок на моделот „Hengchi 5“ во Шведска и еден од ретките модели на „Hengchi“ под брендот „Evergrande“ кој навистина стигнал до сериско производство. Километража: 46 километри
