Влезницата на „Toyota“ во светот на целосно електричните автомобили, градскиот SUV „bZ4X“, по освеженото издание доби и нова верзија. Но, не станува збор само за издолжена варијанта на оригиналниот модел, како што сугерира името. „Toyota bZ4X Touring“ – е многу повеќе од тоа.

На прв поглед, станува збор за ретка комбинација на семеен караван и SUV, со електричен погон. Додека речиси сите производители се насочија кон SUV сегментот, караваните останаа во сенка. Разбирливо, бидејќи возачите бараат повисоки автомобили со робустен дизајн.

Затоа „Toyota“ својот „Touring“ го постави на „високи потпетици“ и му ги даде сите карактеристики што ги цениме кај SUV моделите, па дури и повеќе од тоа. На пример, многу SUV модели не нудат погон на сите четири тркала; „bZ4X Touring“ доаѓа во варијанти со преден и со 4×4 погон.

До „стотка“ за помалку од осум секунди

Верзијата со преден погон располага со 224 коњски сили, што е сосема доволно за секојдневно возење. Автомобилот е агилен и од место до 100 км/ч стигнува за помалку од осум секунди.

AWD верзијата, пак, нуди дури 380 КС. Тоа овозможува забрзување до 100 км/ч за 4,5 секунди, па „bZ4X Touring AWD“ е најбрзата „Toyota“ достапна во Европа, ако не ги сметаме спортските GR верзии.

Бидејќи одзади има дополнителен електромотор, може да влече приколка тешка до 1.500 килограми. Со брзина од 10 км/ч може да помине низ половина метар вода. Кај AWD верзијата стандарден е и „Multi Terrain Monitor“.

Двете изведби имаат батерија од 74,7 kWh, за која „Toyota“ дава гаранција од 10 години или до еден милион изминати километри – дека ќе задржи најмалку 70 проценти од капацитетот.

Декларираниот досег изнесува 591, односно 528 километри, зависно од тоа дали станува збор за преден или погон на сите четири тркала.

Удобно и смирено возење

Доработката на потпирањето и управувачкиот систем резултира со удобно и смирено возење. „bZ4X Touring“ одлично ги апсорбира нерамнините и не се ниша.

„Toyota“ е производител првенствено познат по хибридните автомобили. Во Европа е втор најпродаван бренд, со 86 проценти електрифицирани модели.

„bZ4X Touring“ е 13 сантиметри подолг од стандардниот „bZ4X“. Тоа се чувствува и во внатрешноста: простор има доволно и на предните и на задните седишта, каде и повисоките патници имаат доволно место за глава и нозе.

Забелешка може да се упати само за нешто повисоката позиција на колената, типична за електричните автомобили со батерија сместена во подот.

Багажникот е повеќе од простран. Нуди капацитет од 669 до 1.718 литри.

Уредувањето на ентериерот се надоврзува на робустната надворешност, позната од редизајнираниот „bZ4X“. Ергономијата е примерна, а квалитетот на материјалите кај „Toyota“ веќе стандардно е на високо ниво.

Новите дигитални инструменти се поставени високо, хоризонтално и се прегледни. На централниот 14-инчен екран на допир лесно се снаоѓа корисникот, а под него се наоѓаат два безжични полначи за мобилни телефони, поставени на практична подигната позиција.